Ղահրամանյան․ «Այսօր ամոթի օր է, Էջմիածնում դատում են Ամենայն Հայոց Կաթողիկոսին»

«Այսօր ամոթի օր է. Էջմիածնում դատում են Ամենայն Հայոց Կաթողիկոսին՝ մեր հոգևոր հորը, Եկեղեցու առաջնորդին»,- Ազգային ժողովում իր ելույթում հայտարարեց «Ուժեղ Հայաստան» խմբակցության պատգամավոր Մարիաննա Ղահրամանյանը։

Նրա խոսքով՝ տեղի ունեցողը ոտնձգություն է ոչ միայն Հայ Առաքելական Եկեղեցու, այլև Սահմանադրության նկատմամբ, քանի որ, ինչպես նշեց պատգամավորը, քաղաքական իշխանությունը իրավունք չունի միջամտելու հոգևոր ոլորտին։

Ղահրամանյանը հիշեցրեց 2025 թվականի մայիսի 22-ին Կովկասի մահմեդականների վարչության ղեկավար Ալահշուքյուր Փաշազադե-ի ելույթը, որի ընթացքում վերջինս Հայ Առաքելական Եկեղեցին բնութագրել էր որպես տարածաշրջանի երկրների համար սպառնալիք և հայտարարել, թե Սուրբ Էջմիածինը գտնվում է «պատմական ադրբեջանական հողերի վրա»։ Նրա խոսքով՝ Փաշազադեն նաև Հայ Առաքելական Եկեղեցին ներկայացրել էր որպես «ռևանշիստական կառույց»։

Պատգամավորը նկատեց, որ այդ հայտարարություններից ընդամենը մի քանի օր անց վարչապետ Նիկոլ Փաշինյանը սկսել է հրապարակային քննադատություններ հնչեցնել Հայ Առաքելական Եկեղեցու հասցեին։

Անդրադառնալով Բաքվի վերաքննիչ դատարանի՝ հայ գերիների գործերով կայացրած որոշումներին՝ Ղահրամանյանը նշեց, որ Հայաստանի իշխանությունները ձախողել են արտաքին քաղաքականությունը, իսկ ներքաղաքական դաշտում խորացնում են հասարակական պառակտումները և խաթարում ազգային համերաշխությունը։

Խոսելով Ազգային ժողովի նախագահի տեղակալի պաշտոնում Արամ Վարդևանյանի թեկնածության մասին՝ պատգամավորը նրան հաջողություն մաղթեց՝ նշելով. «Հուսով եմ՝ ձեր փորձն ու մասնագիտական կարողությունները կնպաստեն խորհրդարանի աշխատանքի արդյունավետության բարձրացմանն ու հանրային վստահության ամրապնդմանը»։