Փաթեթը նետեց տանիք, բայց չփրկվեց․ 318 գրամ մեթամֆետամին, երկու կալանավորված

Քրեական ոստիկանության թմրամիջոցների ապօրինի շրջանառության դեմ պայքարի վարչության ծառայողները օպերատիվ տեղեկություն են ստացել, որ Երևանի 39 և 36-ամյա բնակիչները զբաղվում են տարբեր տեսակի թմրամիջոցների ապօրինի ձեռքբերմամբ և իրացմամբ։

Օպերատիվ տեղեկությունը ոստիկանները իրացրել են մայրաքաղաքի պարեկների հետ համագործակցությամբ։ Օգոստոսի 2-ին՝ ժամը 15:00-ի սահմաններում, երբ երկու տղամարդիկ այցելել են Խաղաղ Դոնի փողոցի բնակիչներից մեկի տուն, ոստիկանները նրանց և 33-ամյա տանտիրոջը ձերբակալել են։ Ձերբակալության պահին 36-ամյա տղամարդը ձեռքին եղած փաթեթը նետել է տան տանիք։

Դեպքի առթիվ Էրեբունի և Նուբարաշեն վարչական շրջանների քննչական բաժնում նախաձեռնվել է քրեական վարույթ։ Տան տանիքի զննությամբ հայտնաբերվել է նետված փաթեթը, որի մեջ եղել է 318 գրամ մեթամֆետամինի նմանվող զանգված։

39 և 36-ամյա տղամարդիկ կալանավորվել են։ Երրորդ ձերբակալվածի վերաբերյալ տեղեկություն չի հաղորդվում։ Նախաքննությունը շարունակվում է։