ՄԻՊ-ը կոշտ արձագանքել է․ քրեական գործով անձնական ու ընտանեկան տվյալների հրապարակումն անընդունելի է

Մարդու իրավունքների պաշտպանի աշխատակազմը քրեական վարույթի շրջանակում արձանագրել է անձի անձնական և ընտանեկան կյանքին վերաբերող տվյալների հրապարակման դեպք։ ՄԻՊ-ը նման տեղեկատվության անհարկի հանրայնացումը համարում է անընդունելի։

Պաշտպանի գնահատմամբ՝ անձի ձերբակալությունը կամ նրա նկատմամբ քրեական հետապնդման իրականացումը չի վերացնում մասնավոր կյանքի անձեռնմխելիության իրավունքը։ Պետական մարմինները հանրությանը տեղեկացնելիս պարտավոր են պահպանել անհրաժեշտության և համաչափության սկզբունքները։

ՄԻՊ-ը հատկապես ընդգծել է կանանց իրավունքների պաշտպանության և կրոնական համոզմունքներին վերաբերող զգայուն տեղեկատվության հրապարակման խնդիրը։ Միաժամանակ նշվել է, որ իրավապահ մարմինների հաղորդագրությունները պետք է լիովին համապատասխանեն անմեղության կանխավարկածին։

ՄԻՊ թեժ գծին գործի վերաբերյալ այլ ահազանգեր ևս ստացվել են։ Պաշտպանի հանձնարարությամբ քննչական մարմին է իրականացվել արագ արձագանքման այց՝ անձանց իրավունքների ապահովման վիճակին տեղում ծանոթանալու նպատակով։ Ուսումնասիրության արդյունքների վերաբերյալ հրապարակման ենթակա տեղեկատվությունը կներկայացվի լրացուցիչ։