Բոստոնի արվարձանում դեռահասը սպանել է մորն ու եղբորը. Ի՞նչ կապ ունի ChatGPT-ն

ԱՄՆ-ում Մասաչուսեթս նահանգի Աքթոն քաղաքից 17-ամյա Արջուն Արավինդին մեղադրանք է առաջադրվել մոր և 14-ամյա եղբոր սպանության համար, հաղորդում է NBC News։

Միդլսեքս շրջանի դատախազության տվյալներով՝ հանցագործությունից առաջ դեռահասը համացանցում և ChatGPT-ում ընտանիքի անդամների սպանության մասին տեսական գաղափարներ և ֆանտաստիկ պատմություններ է որոնել։

45-ամյա Սուդա Վենկատեսանի և 14-ամյա Սիդդհարտա Արավինդի մարմինները երեքշաբթի օրը հայտնաբերվել են նրանց տանը, երբ դեռահասի կրկնուսույցը եկել է դասի և չի կարողացել կապ հաստատել բնակիչների հետ։ Ընտանիքի հայրը, որը առավոտյան գնացել էր աշխատանքի և վերջինը խոսել էր կնոջ հետ, դրանից հետո ոստիկանություն է կանչել։

Տղայի մարմինը գտել են առաջին հարկում, մոր մարմինը՝ նկուղում։

Ըստ շրջանի դատախազ Մերիան Ռայանի՝ քննությունը պարզել է, որ վերջին շրջանում դեռահասը անհանգստություն առաջացնող վարքագիծ է դրսևորել։ Նա համացանցը և ChatGPT-ն օգտագործել է ֆանտաստիկ պատմություններ ստեղծելու համար, որոնցում առկա են եղել իր ընտանիքին ուղղված սպառնալիքներ։

«Նա գոթական վեպի ոգով ֆանտաստիկ պատմություններ էր ստեղծում, կերպարներ հորինում և հարցեր տալիս այն մասին, թե ինչ կլինի, եթե մի իրադարձություն տեղի ունենա մյուսի հետ»,- պատմել է Ռայանը։ Նա ասել է, որ այդ սյուժեներն, ըստ ամենայնի, կապված էին ընտանիքի անդամների հասցեին հնչող սպառնալիքների հետ։

Մարմինների հայտնաբերումից հետո տնից անհետացել էին դեռահասն ու նրա մոր ավտոմեքենան՝ 2014 թվականի արտադրության կանաչ Honda Accord-ը։

Շուտով ավտոմեքենան հայտնաբերվել է տնից մոտ 21 կմ հեռավորության վրա՝ Ուեյլենդ քաղաքում։ Չորեքշաբթի վաղ առավոտյան այնտեղ ավտոկայանատեղիում ազդանշան է գործել։ Ժամանած ոստիկանները համարանիշով ճանաչել են ավտոմեքենան և դրա ներսում հայտնաբերել Արջուն Արավինդին։ Դեռահասը ձերբակալվել է առանց դիմադրության։

Սպանության երկու մեղադրանքներից բացի, նրան մեղադրանք է առաջադրվել նաև ընտանիքի անդամների վրա հարձակման և ծեծի, ավտոմեքենայի ապօրինի օգտագործման և ավտոմեքենայի առևանգման համար։

Ոստիկանությունն արդեն առնչվել էր այդ ընտանիքի հետ անցյալ տարի, երբ դեռահասին կարճ ժամանակով անհետ կորած էին հայտարարել։ Այն ժամանակ գործը գնահատվել էր որպես անչափահասի սովորական փախուստ, և իրավապահները բռնության սպառնալիքի նշաններ չէին հայտնաբերել։

Ներկա պահին հայտնի չէ, թե արդյոք դեռահասին փաստաբան նշանակվել է։