ՔՊ-ն տնտեսական հարցերի հանձնաժողովի նախագահի պաշտոնում առաջադրել է Բաբկեն Թունյանին

ԱԺ «Քաղաքացիական պայմանագիր» խմբակցությունը տնտեսական հարցերի մշտական հանձնաժողովի նախագահի պաշտոնում առաջադրել է խմբակցության պատգամավոր Բաբկեն Թունյանի թեկնածությունը։ Թեկնածուին Ազգային ժողովում ներկայացրել է «Քաղաքացիական պայմանագիր» խմբակցության պատգամավոր Լիլիթ Մինասյանը։

Բաբկեն Թունյանը ծնվել է 1980 թվականի սեպտեմբերի 6-ին Երևանում։ Նա ավարտել է Երևանի պետական համալսարանի տնտեսագիտության ֆակուլտետը, այնուհետև նույն ֆակուլտետի մագիստրատուրան՝ ստանալով տնտեսագիտության մագիստրոսի որակավորում։ 2007 թվականին ուսանել է Լոնդոնի տնտեսագիտության դպրոցում (LSE)՝ մասնակցելով «Տնտեսագիտություն և հանրային կառավարում» ծրագրին։

Աշխատանքային գործունեության ընթացքում զբաղեցրել է տարբեր պաշտոններ, ինչպես նաև երկար տարիներ զբաղվել է տնտեսական լրագրությամբ։ Նրա մասնագիտական գործունեությունը գնահատվել է մի շարք մրցանակներով, այդ թվում՝ Բրիտանական խորհրդի, ՀՀ բանկերի միության և ՀՀ վարչապետի կողմից շնորհված պարգևներով։ 2015 թվականին հիմնադրել է B4B.am տեղեկատվական-վերլուծական հարթակը, որը ղեկավարել է մինչև 2019 թվականը։

Քաղաքական գործունեության մեջ Բաբկեն Թունյանը ներգրավվել է 2018 թվականին՝ ընտրվելով Ազգային ժողովի պատգամավոր «Իմ քայլը» դաշինքի համապետական ցուցակով։ 2019-2021 թվականներին նա ղեկավարել է ԱԺ տնտեսական հարցերի մշտական հանձնաժողովը։ 2021 թվականի արտահերթ խորհրդարանական ընտրությունների արդյունքում կրկին ընտրվել է պատգամավոր՝ «Քաղաքացիական պայմանագիր» կուսակցության ցուցակով։

Իր ելույթում Բաբկեն Թունյանը նշեց, որ արդեն ութ տարի է՝ աշխատում է տնտեսական հարցերի մշտական հանձնաժողովում՝ տարբեր կարգավիճակներով՝ որպես անդամ, նախագահի տեղակալ և նախագահի պաշտոնակատար։ Նրա խոսքով՝ այս տարիների ընթացքում հաջողվել է ապահովել ներառական, մասնակցային և արդյունավետ աշխատանքային մթնոլորտ։

Անդրադառնալով երկրի տնտեսական իրավիճակին՝ Թունյանը շեշտեց, որ օգոստոսի 8-ից հետո Հայաստանը գտնվում է նոր իրողությունների պայմաններում, որոնք միաժամանակ նոր հնարավորություններ են ստեղծում տնտեսության զարգացման համար։

«Օգոստոսի 8-ից հետո լրիվ նոր իրականության մեջ ենք ապրում, և այդ իրավիճակը, նոր պայմանները մեր առջև նոր հնարավորություններ են բացում։ Մեր խնդիրն է մաքսիմալ արդյունավետ օգտվել այդ հնարավորություններից։ Այս հարցում տնտեսական հարցերի մշտական հանձնաժողովը, ինչպես նաև մյուս հանձնաժողովները պիտի կարողանան իրենց մասնակցությունն ունենալ այդ գործընթացում»,– ասել է նա։

Բաբկեն Թունյանն ամուսնացած է, ունի երկու զավակ։