Նարեկ Կարապետյանը՝ Բաբկեն Թունյանին․ «Գրեթե չպատմեցիք, թե տնտեսական ի՞նչ ապագա է սպասվում մեր երկրին»

ԱԺ-ում «Ուժեղ Հայաստան» խմբակցության ղեկավար Նարեկ Կարապետյանը դիմել է Տնտեսական հարցերի մշտական հանձնաժողովի նախագահի պաշտոնում առաջադրված Բաբկեն Թունյանին՝ նշելով, որ նրա ներկայացրած ծրագրում բավարար անդրադարձ չի եղել Հայաստանի տնտեսական ապագային։

«Մենք սպասում էինք ձեզանից ավելի պրոակտիվ ներկայացում մեր երկրի ընդհանուր տնտեսական մոդելների, ապագա զարգացման, ոլորտային առաջնահերթությունների մասին, բայց մենք լսեցինք, որ դուք արել եք ինչ-որ քայլեր ու գրեթե չպատմեցիք այն ապագայի մասին, որ առաջարկում եք մեր հանրությանը»,- ասել է Կարապետյանը։

Նրա խոսքով՝ Հայաստանը ներկայում գտնվում է տնտեսական բարձր ցիկլում, պղնձի գինը պատմականորեն բարձր մակարդակում է, իսկ ռուս-ուկրաինական պատերազմի հետևանքով երկրում միլիարդավոր դոլարների ֆինանսական հոսքեր են արձանագրվել։

Կարապետյանը, սակայն, ընդգծել է, որ անգամ այդ լրացուցիչ հնարավորությունների պայմաններում Հայաստանը շարունակում է ավելացնել պետական պարտքը՝ բարձր տոկոսադրույքներով։

Ի պատասխան՝ Բաբկեն Թունյանը նշել է, որ իշխանությունն անցած տարիների աշխատանքի արդյունքները ներկայացրել է ընտրողներին, որոնք իրենց ձայնն ու մանդատն են տվել այդ քաղաքականությունը շարունակելու համար։

Թունյանը նաև անդրադարձել է սոցիալական ցուցանիշներին՝ նշելով, որ վերջին հրապարակված տվյալներով Հայաստանում միջին կենսաթոշակը կազմում է 59 հազար դրամ, իսկ աղքատության միջին գիծը՝ 54 հազար դրամ։ Նրա խոսքով՝ 2026 թվականի համար հրապարակվելիք ցուցանիշները, իր գնահատմամբ, կարող են ավելի լավատեսական լինել։