Փոխըմբռնման հուշագիր Հայաստանի և Իսպանիայի միջև

Հունվարի 30-ից փետրվարի 1-ը աշխատանքային այցով Մադրիդում էին ՀՀ Էկոնոմիկայի նախարարի տեղակալ Արա Պետրոսյանը և Հայաստանի Ազգային մրցունակության հիմնադրամի տնօրեն Արման Խաչատրյանյանը:

Այցի շրջանակում Հայաստանի պատվիրակությունը հանդիպումներ է ունեցել Մադրիդում տեղակայված ՄԱԿ-ի Համաշխարհային զբոսաշրջության կազմակերպության (ՄԱԿ ՀԶԿ՝ UNWTO) գլխավոր քարտուղարի, իսպանական մի շարք ընկերությունների ղեկավարների հետ, մասնակցել Մադրիդում անցկացվող ՖԻՏՈՒՐ (FITUR) Զբոսաշրջության ամենամյա խոշորագույն միջազգային ցուցահանդեսին:

Հունվարի 30-ին ՖԻՏՈՒՐ-ում ՄԱԿ-ի ՀԶԿ հովանու ներքո կազմակերպված Հայաստանի, Ուզբեկստանի, Բոսնիա և Հերցեգովինայի, Ադրբեջանի տուրիստական հնարավորություններին նվիրված «Կլոր սեղանի» ժամանակ Արա Պետրոսյանի ելույթը, որն ուղեկցվել է էկրանին Հայաստանի տեսարժան վայրերի ցուցադրմամբ, արժանացել է մասնագետների բարձր գնահատականներին, ինչպես նաև լրագրողների մեծ ուշադրությանն ու հավանությանը:

Նույն օրը ՀՀ Էկոնոմիկայի փոխնախարարը և Հայաստանի Ազգային մրցակցության հիմնադրամի տնօրենը հանդիպել և բանակցել են իսպանական զբոսաշրջային և հյուրանոցային ընկերությունների ներկայացուցիչների հետ, որոնք հետաքրքրված են իսպանական հյուրանոցային ցանցերի՝ Հայաստան մուտք գործելու հարցում: Պայմանավորվածություն է ձեռք բերվել առաջիկայում կազմակերպել վերջիններիս ճանաչողական այցը Հայաստան:

Հունվարի 30-ի երեկոյան ՀՀ Էկոնոմիկայի նախարարի տեղակալ Արա Պետրոսյանը և Իսպանիայի Զբոսաշրջության հարցերով պետական քարտուղար Իզաբել Բոռեգո Կորտեսը ստորագրել են զբոսաշրջության ոլորտում համագործակցության մասին Փոխըմբռնման հուշագիր: Փաստաթուղթը կնքվել է Հայաստանի Էկոնոմիկայի նախարարության և Իսպանիայի արդյունաբերության, էներգետիկայի և զբոսաշրջության նախարարության միջև:

Փետրվարի 1-ին Հայաստանի պատվիրակությանն ընդունել է ՄԱԿ-ի Համաշխարհային զբոսաշրջության կազմակերպության գլխավոր քարտուղար Թալեբ Ռիֆային: Հանդիպմանը մասնակցել են գլխավոր քարտուղարի տեղակալ Զոլտան Սոմագիյը, Եվրոպայի տարածաշրջանային տնօրեն Իզաբել Գառանյան:

Պարոն Ռիֆային գոհունակություն է հայտնել Հայաստանի ղեկավարության կողմից զբոսաշրջության զարգացմանը մեծ ուշադրություն հատկացնելու ու այդ ուղղությամբ ձեռնարկվող գործուն քայլերի առիթով և արտահայտել կազմակերպության և իր անձնական աջակցության պատրաստակամությունը: Կողմերը քննարկել են ընթացիկ տարվա սեպտեմբերին Իսպանիայում Հայաստանի զբոսաշրջության և հայկական մշակույթի օրեր կազմակերպելու հնարավորությունը: Թալեբ Ռիֆային կարևորել է առաջիկայում Հայաստանի ներգրավվածությունը ՄԱԿ ՀԶԿ ղեկավար ատյանում և առաջարկել խորացնել այդ ուղղությամբ համագործակցությունը:

Հայաստանի պատվիրակությունը մասնակցել է ՖԻՏՈՒՐ ցուցահանդեսի Հայաստանի տաղավարում Իսպանիայում ՀՀ դեսպանության և Հայաստանի Ազգային մրցունակության հիմնադրամի կողմից համատեղ կազմակերպված «Հայաստան. հպարտություն և կիրք» (Armenia: orgullo y pasion) վերնագրով իսպաներեն լեզվով լույս տեսած 230 էջանոց տուրիստական ձեռնարկի շնորհանդեսին:

Հայաստանի Ազգային մրցունակության հիմնադրամի տնօրեն Արման Խաչատրյանյանի, գրքի հեղինակ Խոսե Մարիա Կալի ելույթներից հետո, իր շնորհակալական խոսքն է հղել Իսպանիայում ՀՀ գործերի հավատարմատար Խորեն Տերտերյանը և իսպանացի հեղինակին հանձնել արժեքավոր հուշանվեր: Հայ համայնքի աջակցությամբ շնորհանդեսին հնչել են հայկական դուդուկի մեղեդիներ, մատուցվել հայկական ուտեստներ:

Այցի ընթացքում ՀՀ էկոնոմիկայի նախարարի տեղակալ Արա Պետրոսյանը հանդիպումներ է ունեցել Իսպանիայի գործրար շրջնակները ներկայացնող Trocadero Consultores և Cremades & Calvo Sotelo ընկերությունների ղեկավարության հետ: Քննարկվել են այդ ընկերություններին Հայաստանի տնտեսության մեջ կոնկրետ ծրագրերով ներգրավելու հնարավորությունները: