Ո՞վ է լինելու հաջորդը. Դեդ Հասանի «վենդետտայի» հերթական զոհը

Թուրքիայում մահափորձ է կատարվել ադրբեջանցի «օրենքով գող» Ռովշան Ջանիևի նկատմամբ, ով ավելի հայտնի է Ռովշան Լենքորանսկի մականունով: Այս մասին հաղորդում է «Փրայմ քրայմ» լրատվական գործակալությունը: Լրատվականի աղբյուրների փոխանցմամբ՝ Ջանիևի ստացած վնասվածքը մահացու է եղել։

Մոսկվայում «օրենքով գող» Ջեմալ Միքելաձեի (Ջեմո) ձերբակալությունից հետո Ռուսաստանում և Թուրքիայում մահափորձեր են կատարվել նրա աջակիցների դեմ: Լենքորանսկուց բացի մահափորձ է իրականացվել նաև «Կուզիկ» մականունով հայտնի Ահմեդ Եվլոևի դեմ: Այս հարձակումները տեղի են ունեցել միաժամանակ:

Հիշեցնենք, որ ավելի վաղ սպանվել էր Լենքորանսկու ազգական և նրա կողմից թագադրված «օրենքով գող» ադրբեջանցի Ռուֆաթ Նասիբովը՝ Ռուֆո Գյանջինսկին, ով, որոշ աղբյուրների համաձայն, եղել է Դեդ Հասանին մահացու վիրավորած մարդասպանների ղեկավարը: Այս սպանությունը դիտարկվում է իբրև Դեդ Հասանի սպանության համար վրեժ: Ընդ որում, Լենքորանսկին համարվում է Դեդ Հասանի սպանությունն իրագործած գլխավոր «ուժը»: