Թրամփը տնտեսական հետևանքներով է սպառնացել Իրանին աջակցող երկրներին

ԱՄՆ նախագահ Դոնալդ Թրամփը զգուշացրել է, որ ցանկացած երկիր, որը որևէ տեսակի աջակցություն կցուցաբերի Իրանին, կարող է բախվել լուրջ տնտեսական հետևանքների։ Reuters-ի փոխանցմամբ՝ Թրամփը խոստացել է Իրանի նկատմամբ կիրառել «աննախադեպ մասշտաբի տնտեսական պատերազմ և մեկուսացում»։

Թրամփի խոսքով՝ տնտեսական ճնշման կարող են ենթարկվել այն երկրները, որոնց ֆինանսական հաստատությունները, ընկերությունները, օդանավակայանները կամ պետական կառույցները կօգնեն Իրանին։ Սակայն ԱՄՆ նախագահը չի հստակեցրել, թե կոնկրետ ինչ միջոցներ են կիրառվելու և որ երկրների մասին է խոսքը։ Միևնույն ժամանակ, ԱՄԷ-ն արդեն հայտարարել է Իրանի հետ առևտրային, գործարար և ֆինանսական բոլոր գործառնությունների դադարեցման մասին՝ մինչև հետագա ծանուցումը։

Իրանի արտգործնախարար Աբբաս Արաղչին Թրամփի հայտարարություններն անվանել է ամերիկյան հասարակության ուշադրությունը ԱՄՆ-ի ներքին ֆինանսական խնդիրներից շեղելու փորձ։ Նա հայտարարել է, որ Վաշինգտոնի «տնտեսական ահաբեկչությունը» սպառնում է համաշխարհային տնտեսությանը և տարբեր երկրների ինքնիշխանությանը։ Reuters-ը նաև նշում է, որ Չինաստանին բաժին է ընկնում Իրանի ծովային ճանապարհով արտահանվող նավթի ավելի քան 80%-ը։