Գիտնականները պարզել են՝ օրվա որ ժամերին սնվելը կարող է կապված լինել երկարակեցության հետ

Առաջին և վերջին սննդի ընդունման ժամը կարող է կապված լինել կյանքի տևողության հետ։ Այս եզրակացությանն են եկել գիտնականները՝ ուսումնասիրելով 40 տարեկանից բարձր ավելի քան 31 հազար ամերիկացիների տվյալները։ Հետազոտությունը հրապարակվել է European Journal of Clinical Nutrition գիտական ամսագրում։

Ամենաբարենպաստ ցուցանիշները գրանցվել են այն մարդկանց մոտ, ովքեր օրվա առաջին սնունդն ընդունել են ժամը 07:00–08:00-ին, իսկ վերջինը՝ 19:00–20:00-ին։ Կեսօրից հետո առաջին անգամ սնվողների մոտ բոլոր պատճառներով մահվան ռիսկը 29%-ով, իսկ սրտանոթային հիվանդություններից՝ 46%-ով բարձր է եղել։ Կեսգիշերից հետո սնվելը ևս կապված է եղել համապատասխանաբար 27% և 38% ավելի բարձր ռիսկի հետ։

Հաշվարկների համաձայն՝ 50 տարեկանում կյանքի սպասվող տևողությունը միջինում 2,5 տարով պակաս է եղել նրանց մոտ, ովքեր սովորաբար առաջին անգամ սնվել են միայն ժամը 12:00-ից հետո։ Գիտնականները, սակայն, ընդգծում են, որ հետազոտությունը ցույց է տալիս կապ, այլ ոչ թե ապացուցում, որ հենց սնվելու ժամերն են կյանքի տևողության տարբերության պատճառը։