«Թող մաքրվեն հավաքականից, որ իմանամ՝ ում հետ եմ գնում պատերազմի»․ Եղիշե Մելիքյանի կոշտ հայտարարությունը

Հայաստանի ազգային հավաքականի գլխավոր մարզիչ Եղիշե Մելիքյանը «Ժողովուրդ»-ին տված հարցազրույցում խոսել է ազգային թիմը գլխավորելու որոշման, հավաքականի նկատմամբ նվիրվածության և այն ֆուտբոլիստների մասին, որոնք տարբեր պատճառներով հրաժարվում են հանդես գալ Հայաստանի հավաքականում։

Մելիքյանը նշել է, որ չի վախենում պարտվելուց և ազգային թիմը գլխավորելու որոշումը կայացրել է դժվար ժամանակահատվածում հավաքականի կողքին լինելու համար։ Նրա խոսքով՝ ֆուտբոլում պարտությունն ու հաղթանակը պետք է ընդունել որպես պայքարի մաս։

Միաժամանակ մարզիչը քննադատել է այն ֆուտբոլիստներին, որոնք, իր խոսքով, ակումբներում խաղում են, սակայն տարբեր պատճառաբանություններով հրաժարվում են ազգային հավաքականից։ Նա զուգահեռ է անցկացրել ներկայիս իրավիճակի և նախկինում հավաքականին նվիրված խաղացողների՝ Ռոմիկ Խաչատրյանի, Արթուր Պետրոսյանի, Արմեն Շահգելդյանի և Սարգիս Հովսեփյանի վերաբերմունքի միջև։

«Ես ուրախ եմ, որ հրաժարվող տեսակները մաքրվում են մեր ազգային հավաքականից։ Թող մաքրվեն, որ ես իմանամ՝ ում հետ եմ գնում պատերազմի։ Ինձ ավելի լավ է անփորձ, զենքը լավ չբռնող, բայց կռվող տղա․ ես նրան կսովորեցնեմ զենք բռնել, ու գիտեմ, որ նա մինչև մահ կգնա կռվի։ Ինձ այդ տեսակն է պետք»,- ասել է Մելիքյանը։

Նա ընդգծել է, որ ցանկանում է հավաքականում տեսնել նվիրյալ ֆուտբոլիստների և պատրաստ է նրանց հետ միասին կիսել ինչպես պարտությունը, այնպես էլ հաղթանակը։