Աշխարհի ամենահարուստ ֆուտբոլիստը 28 տարեկանում մնացել է առանց ակումբի

Բրունեյի սուլթանի եղբորորդի Ֆաիք Բոլկիահը, որի կարողությունը գնահատվել է շուրջ 20 միլիարդ դոլար, ժամանակին համարվում էր աշխարհի ամենահարուստ ֆուտբոլիստը։ Նա մանկուց զբաղվել է ֆուտբոլով, մարզվել «Սաութհեմփթոնի», «Արսենալի» և «Չելսիի» ակադեմիաներում, իսկ 18 տարեկանում պայմանագիր կնքել «Լեսթերի» հետ։ Սակայն երեք մրցաշրջանի ընթացքում Բոլկիահին չի հաջողվել նորամուտը նշել անգլիական ակումբի հիմնական կազմում։ Այս մասին գրում է ՌԻԱ Նովոստին։

Անգլիայից հեռանալուց հետո Բոլկիահը կարիերան շարունակել է Պորտուգալիայի «Մարիտիմուում», իսկ ավելի ուշ տեղափոխվել Թաիլանդ։ «Չոնբուրիի» կազմում նա երկու մրցաշրջանում անցկացրել է 32 հանդիպում՝ խփելով երկու գոլ և կատարելով չորս գոլային փոխանցում։ Այնուհետև ֆուտբոլիստը միացել է «Ռատչաբուրիին», որի կազմում 23 խաղում դարձել է երկու գոլի և մեկ գոլային փոխանցման հեղինակ։

Այժմ 28-ամյա Բոլկիահը որևէ ակումբի հետ պայմանագիր չունի։ Transfermarkt-ը նրա տրանսֆերային արժեքը գնահատում է 100 հազար եվրո։ Վերջին մրցաշրջաններից առաջ ֆուտբոլիստը նաև ծանր վնասվածք է ստացել և երկար ժամանակ վերականգնվել, իսկ վերջին մեկ տարվա ընթացքում սոցիալական ցանցերում ֆուտբոլին վերաբերող հրապարակումներ գրեթե չի արել։ Առայժմ հայտնի չէ՝ Բոլկիահը կշարունակի՞ պրոֆեսիոնալ կարիերան, թե՞ կհեռանա մեծ ֆուտբոլից։