Մխիթարյանը՝ «Ինտերի» հավակնությունների, քննադատությունների և թիմի առաջիկա խաղերի մասին

Միլանի «Ինտերը» հոկտեմբերի 10-ին Իտալիայի առաջնության 6-րդ տուրում սեփական հարկի տակ 3։0 հաշվով հաղթել է «Պարմային»։ Հանդիպման երրորդ գոլը հեղինակել է Մարկուս Թյուրամը՝ օգտվելով Հենրիխ Մխիթարյանի փոխանցումից։

Խաղից հետո Հայաստանի հավաքականի նախկին կիսապաշտպանը պատասխանել է Sport Mediaset-ի լրագրողի հարցերին։

Մխիթարյանը նշել է, որ երեքշաբաթյա դադարից հետո խաղադաշտ վերադառնալը հեշտ չէր, սակայն թիմը գիտակցում էր՝ անհրաժեշտ է առավելագույնը ներդնել հաղթանակի համար։

«Մենք շատ ուժեղ սկսեցինք, խփեցինք երեք գոլ, ապա վերահսկեցինք խաղը։ Թեև կարող էինք ավելի շատ գոլեր խփել, այսօր դա չհաջողվեց»,- ասել է ֆուտբոլիստը։

Անդրադառնալով իր խաղաժամանակին և թիմակիցների վնասվածքներին՝ Մխիթարյանն ընդգծել է, որ «Ինտերի» յուրաքանչյուր ֆուտբոլիստ կարևոր է թիմի համար։

«Ցավում եմ վնասվածք ստացած Կուրտիս Ջոնսի և Ջոն Սթոունսի համար, բայց դա ֆուտբոլի մի մասն է։ Մենք պետք է առաջ նայենք և պատրաստ լինենք օգնելու թիմին։ Առաջիկա 27 օրվա ընթացքում մեզ շատ հանդիպումներ են սպասվում, և մենք պետք է պատրաստ լինենք բարձր մակարդակով մրցակցելու բոլորի հետ։

Ինձ համար նշանակություն չունի՝ կխաղամ 90, 60, թե 15 րոպե։ Ես գիտեմ՝ ինչ են ինձնից սպասում, ինչ են ակնկալում թիմակիցներս, և անում եմ հնարավոր ամեն ինչ՝ նրանց օգնելու համար»,- նշել է հայ ֆուտբոլիստը։

Մխիթարյանն անդրադարձել է նաև թիմի հասցեին հնչող քննադատություններին և Չեմպիոնների լիգայում «Ինտերի» հավակնություններին։

«Ամեն անգամ խոսում ենք մեր նպատակների մասին, և ամեն անգամ հայտնվում են հոդվածներ, որոնք պարզապես ծիծաղ են առաջացնում։ Արդեն չորս տարի է՝ ասում ենք, որ ցանկանում ենք պայքարել բոլոր մրցաշարերում։ Վերջին երեք տարիներին երկու անգամ հասել ենք Չեմպիոնների լիգայի եզրափակիչ։ Հետո սկսում են խոսել՝ չհաղթեցին, չհաղթեցին…

Մեր նպատակները միշտ բարձր են եղել, և մենք բարձրաձայնում ենք այն, ինչին, կարծում ենք, կարող ենք հասնել։ Դա կոչվում է հավակնություն։ Մենք հավակնոտ ենք և ցանկանում ենք հնարավորինս առաջ գնալ ու բարձր արդյունքների հասնել»,- ասել է Մխիթարյանը։

«Ինտերի» հաջորդ հանդիպումը նախատեսված է հոկտեմբերի 13-ին․ միլանյան ակումբը Չեմպիոնների լիգայի շրջանակում կմրցի բելգիական «Բրյուգեի» հետ։ Հրապարակման համաձայն՝ Կրիստիան Կիվուի գլխավորած թիմը մրցաշարի լիգայի փուլի աղյուսակում զբաղեցնում է 26-րդ հորիզոնականը։ Մեկնարկային տուրում «Ինտերը» 1։2 հաշվով պարտվել էր Մադրիդի «Ռեալին»։