TRIPP-ի երթուղին դեռ որոշված չէ․ Միրզոյանը չհստակեցրեց՝ որտեղով կանցնեն ենթակառուցվածքները

ԱԺ արտաքին հարաբերությունների մշտական հանձնաժողովի նիստում «Թրամփի ուղի՝ հանուն միջազգային խաղաղության և բարգավաճման» (TRIPP) նախագծի վերաբերյալ համաձայնագրի վավերացման հարցի քննարկման ժամանակ «Հայաստան» խմբակցության պատգամավոր Քրիստինե Վարդանյանը հետաքրքրվեց՝ որքան է լինելու նախագծի ենթակառուցվածքների համար նախատեսված հողաշերտի լայնությունը, արդյոք նավթամուղը, գազամուղը, երկաթուղին և ավտոճանապարհը կանցնեն նույն տարածքով, թե տարբեր հատվածներով, ինչպես նաև՝ նախատեսվո՞ւմ են կանգառներ ՀՀ տարածքում։

Արտաքին գործերի նախարար Արարատ Միրզոյանը պարզաբանեց, որ TRIPP-ը մեկ միասնական միջանցք կամ հողաշերտ չէ, և բոլոր ենթակառուցվածքները չեն կարող տեղակայվել նույն նեղ տարածքում։

Նրա խոսքով՝ Մեղրու երկաթուղու երկայնքով նավթամուղի կամ գազամուղի անցկացումը գործնականում դժվար է՝ տեղանքի առանձնահատկությունների պատճառով։

«Մեղրու երկաթուղու երկայնքով նավթամուղ կամ գազամուղ չեմ պատկերացնում։ Այդտեղ տեղ չկա, շատ քիչ տեղ կա։ [...] Այդտեղ մի կողմից կա գետ, կա մի փոքր շերտ, և կան ժայռեր։ Այնտեղով ամենահարմարն է, որ անցնի երկաթուղին։ [...] Նավթամուղ և գազամուղ այդտեղ չեմ պատկերացնում»,- ասաց նախարարը՝ չբացառելով, որ, օրինակ, նավթամուղը կարող է անցնել Հայաստանի հյուսիսով։

Միրզոյանի խոսքով՝ ենթակառուցվածքների անցկացման կոնկրետ տեղանքները դեռ որոշված չեն, ուստի այս փուլում դժվար է նշել նաև դրանց համար անհրաժեշտ տարածքի լայնությունը։

Անդրադառնալով ՀՀ տարածքում երկաթուղային կանգառների հնարավորությանը՝ նախարարը նշեց, որ դրանք անհրաժեշտ են, քանի որ Հայաստանը պետք է հնարավորություն ունենա օգտվելու երկաթուղուց։

«Իրավունք ունենք լիարժեք օգտագործել, բան դնել ռելսի վրա և տանել աջ կամ ձախ, ասենք՝ տանել մեր կողմից ձախ, այսինքն՝ Նախիջևան, Նախիջևանով բարձրացնել Երասխ, մտցնել Հայաստան կամ հակառակը՝ Նախիջևանում իջեցնել։ Այդ կտորում կա կապ Իրանի Իսլամական Հանրապետության հետ, և ահա այստեղ կարող ենք իջեցնել՝ ԻԻՀ-ի հետ երկաթուղային կապ ունենալու համար»,- ասաց Միրզոյանը։

Նրա գնահատմամբ՝ նախագիծը Հայաստանի համար կարող է պատմական հնարավորություն դառնալ՝ երկաթուղային կապ հաստատելու ոչ միայն Իրանի, այլև Ադրբեջանի և դրա միջոցով՝ Կենտրոնական Ասիայի, Չինաստանի ու Ռուսաստանի ուղղություններով։

Նախարարը նաև չբացառեց, որ հետագայում երկաթուղին կարող է օգտագործվել ուղևորափոխադրումների համար, ինչի դեպքում ուղևորները կարող են կանգառներ ունենալ Հայաստանի տարածքում։