Տեղի ունեցավ ԵՄ ծրագրի եզրափակիչ միջոցառումը

Փետրվարի 12-ին ՀՀ Էկոնոմիկայի նախարարությունում տեղի ունեցավ ԵՄ աջակցության գործիքների օգտագործումը խրախուսող ԵՄ ծրագրի եզրափակիչ միջոցառումը:

«Աջակցություն Հայաստանում Թվինինգ և Թայեքս ծրագրերի կառավարման գրասենյակին» (SATTO) ծրագրի եզրափակիչ միջոցառմանը ողջույնի խոսքով հանդես եկան ՀՀ էկոնոմիկայի նախարարի տեղակալ Գարեգին Մելքոնյանը և Հայաստանում ԵՄ Պատվիրակության գործառնական բաժնի ղեկավար Ժան-Քրիստոֆ Գայրանը:

Միջոցառմանը, որին մասնակցում էին հայաստանյան պետական կառավարման մարմինների, Հայաստանում ԵՄ Պատվիրակության և ԵՄ անդամ պետությունների ներկայացուցիչներ, ներկայացվեցին SATTO քառամյա ծրագրի գործունեության արդյունքները: SATTO ծրագրի հիմնական նպատակն է օգնել Հայաստանին լավագույնս օգտվելու ԵՄ աջակցությունից, մասնավորապես ինստիտուցիոնալ հզորացման Թվինինգ և Թայեքս գործիքներից: Այս համագործակցությունը համընթաց է ՀՀ-ԵՄ ասոցացման և Խոր և համապարփակ ազատ առևտրի գոտու (ԽՀԱԱԳ) ստեղծման գործընթացին:

Ներկայումս Հայաստանը 18 Թվինինգ ծրագրերի (որոնցից 10-ը գտնվում են իրականացման և 8-ը՝ նախապատրաստական փուլում) շահառու է այնպիսի ոլորտներում, ինչպիսիք են օդային անվտանգությունը, ստանդարտացումը, սպառողների շահերի պաշտպանությունը, սննդի անվտանգությունը, մրցունակությունը, բարձրագույն կրթությունը, արդարադատությունը, միգրացիան, մաքսային համակարգը և այլն:

Ավելի քան 100 Թայեքս միջոցառումներ են կազմակերպվել առավել մեծ թվով ոլորտներում:

SATTO ծրագիրը ֆինանսավորվում է ԵՄ կողմից: