ВТБ-ն Արմավիային 22 մլն դոլարի հայց է ներկայացրել

Ինչպես գրում է ռուսական «Իզվեստիա» պարբերականը, ՎՏԲ ռուսաստանյան բանկը 22 մլն դոլարի հայց է ներկայացրել հայ գործարար Միքայել Բաղդասարովին պատկանող Արմավիա ազգային ավիափոխադրողի և Mika Limited ընկերությունների նկատմամբ:

ՎՏԲ բանկը փորձում է հետ ստանալ այն վարկերը, որոնք տրամադրել է Արմավիայի վարկերը վերաֆինանսավորելու նպատակով, և որոնք Արմավիան օգտագործել էր Sukhoi Superjet-100 օդանավի ձեռքբերման համար:

Իրավաբանները կարծում են, որ ՎՏԲ-ն շատ լավ շանսեր ունի գործը հաղթելու համար։

2010-2011թթ. ՎՏԲ ռուսաստանյան բանկի հայկական մասնաճյուղն ավելի քան 7 մլն դոլարի վարկ էր տրամադրել Արմավիային: Գումարներն ուղղված էին Sukhoi Superjet-100-ը գնելու համար Արմավիային Արդշինինվեստբանկի կողմից տրամադրված վարկերը վերաֆինանսավորելուն: Բացի այդ, 2010-ին ՎՏԲ-ի երևանյան մասնաճյուղը 8 մլն դոլար վարկ էր տրամադրել Mika Limited ընկերությանը, որի համար երաշխավոր էր հանդես եկել Արմավիան: Վարկը հետ վերադարձնելու ժամկետը լրացել է 2012-ին, սակայն ո՛չ Արմավիան, ո՛չ էլ Mika Limited-ը գումարը չեն վճարել ֆինանսական խնդիրների առկայության պատճառով:

Անցյալ տարվանից պարտքերը հետ պահանջելու իրավունքը բանկի հայկական մասնաճյուղից անցել է ռուսական ՎՏԲ-ին:

Միքայել Բաղդասարովն իր հերթին «Իզվեստիա»-ին տեղեկացրել է, որ մոտ ժամանակներս պարտքը կմարվի, սակայն չի պարզաբանել մանրամասները:

Իսկ Արմավիան իր հերթին կարող է անցնել պետության ձեռքը. գրում է պարբերականը: 2013թ. փետրվարի 6-ին ՀՀ քաղավիացիայի վարչության պետ Արտյոմ Մովսիսյանն Ազգային ժողովում ելույթ ունենալիս հայտարարել էր, որ Հայաստանի կառավարությունն անհանգստացած է Արմավիայի շուրջ ծավալված իրադարձություններով: Նա չի բացառել, որ ազգային ավիափոխադրողի բաժնեմասերը կարող են անցնել այլ անձանց կամ հենց պետության տնօրինությանը: