Սանկտ Պետերբուրգում ձերբակալվել է ադրբեջանցիներից բաղկացած հանցախումբ

Սանկտ Պետերբուրգում 6 և 12 տարի ազատազրկման են դատապարտվել ադրբեջանցիներից բաղկացած հանցախմբի անդամները: Այս մասին Regnum-ին հայտնել են Սանկտ Պետերբուրգի հետաքննչական բաժանմունքի մամլո ծառայությունից: 

Հաղորդագրության մեջ ասված է, որ հետաքննչական մարմինների ունեցած տվյալները բավարար են Ադրբեջանի քաղաքացիներ, եղբայրներ Գարայ և Մագամեդալի Աբդիևներից և նրանց զարմիկ Վուգար Աբդիևից բաղկացած հանցախմբի նկատմամբ դատավճիռ կայացնելու համար: Հանցախմբի մասնակիցները մեղավոր են ճանաչվել ՌԴ քրեական օրենսգրքի 209 հոդվածի 1, 2 կետերով, 105 հոդվածի 1 կետով, 213 հոդվածի 2 կետով, 162 հոդվածի 4-րդ կետով, 163 հոդվածի 3-րդ կետով,318 հոդվածի 2-րդ մասով, 222 հոդվածի 3-րդ մասով:

Հետաքննությունը պարզել է, որ Գարայ Աբդուևը ստեղծել է զինված հանցախումբ, որի մեջ ներգրավել է իր եղբայր Մագամեդալիին և բարեկամ Վուգար Աբդիևին: 2007-2009 թվականների ընթացքում հանցախմբի մասնակիցները իրենց հսկողության տակ են «վերցրել» Սանկտ Պետերբուրգի՝ Նևսկի վարչական շրջանում ձեռնարկատիրությամբ զբաղվող հայրենակիցներին: Եկամուտ ստանալու համար նրանք առևանգել են 2 մարդու, հեղինակել երեք ավազակային հարձակումներ, կատարել շորթումներ:

Բացի դա 2001 թվականի հունվարի 14-ին Մագամեդալի Աբդիևը սպանել է Ադրբեջանի քաղաքացու՝ մի քանի դանակի հարվածներ հասցնելով վերջինիս: 

Գարայ և Մագամեդալի Աբդիևները դատապարտվել են 12 տարի, իսկ Վուգար Աբդիևը՝ 6 տարի ազատազրկման: