Սանկտ Պետերբուրգում ծեծկռտուք սարքած «անդրկովկասյան հանրապետության» քաղաքացիներն ադրբեջանցիներ են եղել

Նախօրեին Ռուսաստանի հյուսիսային մայրաքաղաք Սանկտ Պետերբուրգում «անդրկովկասյան հանրապետություններից մեկի» 30-40 քաղաքացիների կազմակերպած ծեծկռտուքի մասնակցիներից նվազագույնը 20 հոգին ադրբեջանցիներ են եղել:

Ծեծկռտուքի ժամանակ գործի են դրվել ատրճանակներ, դանակ, բեյսբոլի մահակ, տուժել են պատահական անցորդներ. գրում է Комсомольская правда-ն:

Տարբեր տվյալներով՝ 3-5 մարդ հոսպիտալացվել է:

Ծեծկռտուքը ֆիքսել է հսկող տեսախցիկը:

«Չիստիե պրուդի» սրճարանի տնօրեն, նույնպես ծագումով ադրբեջանցի Սադաղաթ Մանաֆովն ականատես է եղել անկարգություններին:

Фонатка.ru-ն գրում է, որ ծեծկռտուքը հրահրել են ոչ թե պարզապես կովկասյան այդ հանրապետության քաղաքացիները, այլ ադրբեջանական նույն գյուղի բնակիչներ:

Ենթադրվում է, որ կրակոցների ու քաշքշոցի պատճառ է հանդիսացել բիզնեսի ոլորտում նրանց միջև եղած տարաձայնությունները:

Հիշեցնենք, որ Սանկտ Պետերբուրգի հարավում փետրվարի 19-ի երեկոյան զանգվածային ծեծկռտուք է տեղի ունեցել ավելի քան 3 տասնյակ մարդկանց մասնակցությամբ. հայտնում են ՌԴ ՆԳՆ Պետերբուրգի և Լենինգրադյան շրջանի պետական վարչությունից:

Դեպքը տեղի է ունեցել Դիմիտրովի փողոցի «Չիստիե պրուդի» սրճարանում: Դեպքի վայր ժամանած ոստիկանները ձերբակալել են 15 հոգու: Եվս 4 հոգի տարբեր աստիճանի վնասվածքներով հոսպիտալացվել են: Ոստիկանությունը բացառել է միջադեպի՝ ազգային պատկանելիության հողի վրա լինելու հանգամանքը, իսկ ծեծկռտուքի բոլոր մասնակիցները եղել են «անդրկովկասյան հանրապետության ներկայացուցիչներ»: