Մեկնարկել է հարկային բարեփոխումների նոր` քառամյա ծրագիրը

Երևանում այսօր պաշտոնապես մեկնարկել է ԱՄՆ Միջազգային զարգացման գործակալության հարկային բարեփոխումների նոր՝ քառամյա ծրագիրը, որի նպատակը Հայաստանի հարկային միջավայրի բարելավումն է: Ծրագրի իրագործման նպատակով նաև փոխըմբռնման հուշագիր է ստորագրվել պետական եկամուտների կոմիտեի, ֆինանսների նախարարության և ԱՄՆ ՄԶԳ հայաստանյան գրասենյակի միջև:

Ողջունելով միջոցառման մասնակիցներին՝ ՊԵԿ նախագահ Գագիկ Խաչատրյանն ընդգծել է, որ վերջին տարիները ՊԵԿ-ի համար բնութագրվել են հարկային բարեփոխումների ուղղությամբ իրականացվող լայնածավալ աշխատանքներով: «Հարկ է նշել, որ բարեփոխումների իրագործմանը մեծապես նպաստում է գործընկեր դոնոր կազմակերպությունների հետ մեր շարունակական ակտիվ համագործակցությունը: Այդ առումով 2012 թվականը մեզ համար նշանավորվեց Համաշխարհային բանկի հետ «Հարկային վարչարարության արդիականացման ծրագրի» հաստատմամբ, որը նախորդող երկու տարվա համատեղ աշխատանքի արդյունք էր: Միաժամանակ, մեկնարկեց ԱՄՆ Միջազգային զարգացման գործակալության կողմից իրականացվող «Հարկային բարեփոխումների ծրագիրը», որը կոչված է ապահովելու Համաշխարհային բանկի ծրագրի տեխնիկական կողմը»,-ասել է կոմիտեի ղեկավարը:

Հարկային վարչարարության բարեփոխումները ձևավորել են այնպիսի իրողություններ, որոնք կոմիտեի համար բավարար հիմք են ստեղծել զարգացման որակական նոր փուլի անցնելու համար: Այդ խնդրի լուծմանն են ուղղված նաև ՊԵԿ գործընկերների հետ իրականացվող համատեղ ծրագրերը: Ըստ Գագիկ Խաչատրյանի, ծրագրերի շրջանակներում Համաշխարհային Բանկը կֆինանսավորի Հայաստանի հարկային համակարգի հետագա զարգացումը երեք կարևորագույն ուղղություններով: Մասնավորապես, հարկային մարմինների ՏՏ ենթակառուցվածքի զարգացում, որը ենթադրում է «Հարկատու 3» համակարգի կատարելագործում, տվյալների մշակման կայանների հիմնում, Էլեկտրոնային հաշվետվությունների և վճարումների ամբողջական համակարգերի գործարկում, հարկ վճարողների սպասարկման ենթակառուցվածքի արդիականացում, ռիսկային գործոնների վրա հիմնված ժամանակակից հարկային հսկողության համակարգի կատարելագործում, ինչպես նաև ՊԵԿ ինստիտուցիոնալ զարգացում և մարդկային ռեսուրսների կառավարման արդյունավետ համակարգի ձևավորում: Նախատեսվում է օպտիմալացնել հարկային տեսչությունների կառուցվածքը, տնտեսել մարդկային և ֆինանսական ռեսուրսները, ներդնել անձնակազմի կառավարման արդյունավետ համակարգ, որը թույլ կտա նվազեցնել կոռուպցիոն ռիսկերը, կրճատել հարկային ծառայողների և հարկ վճարողների միջև շփումները:

Իսկ ԱՄՆ Միջազգային զարգացման գործակալության ծրագրի շահառու՝ «Դելոիթ» ընկերությունն ապահովելու է նշված աշխատանքների տեխնիկական կողմը: Մասնավորապես ՊԵԿ-ին տրամադրելու է մասնագիտական խորհրդատվություն՝ «Հարկային վարչարարության արդիականացման ծրագրի» պատշաճ իրագործումն ապահովելու նպատակով, մշակելու է հարկային անձնակազմի կառավարման սկզբունքորեն նոր համակարգ և ապահովելու է հարկային մարմինների վերլուծական կարողությունների բարձրացումը: Աջակցելու է նաև նոր էլեկտրոնային ծառայությունների ներդրմանը, ռիսկերի վրա հիմնված հարկային ստուգումների համակարգի կատարելագործմանը, ինչպես նաև եկամտային հարկի և կուտակային վճարի անձնավորված հաշվառման համար անհրաժեշտ տեխնիկական փաստաթղթերի մշակմանը:

Հարկային բարեփոխումների ծրագրի իրագործման արդյունքում, ըստ կոմիտեի ղեկավարի, ակնկալվում է, որ ՊԵԿ-ը կունենա միջազգային լավագույն փորձին համահունչ տեղեկատվության կառավարման էլեկտրոնային համակարգ, հարկային մարմինների օպտիմալ կառուցվածք, բարձր մասնագիտական պատրաստվածությամբ անձնակազմ և կմատուցի հարկ վճարողներին որակյալ ծառայություններ՝ միասնական չափանիշներով: Շնորհակալություն հայտնելով գործընկերներին արդյունավետ համագործակցության համար՝ Գագիկ Խաչատրյանը հույս է հայտնել, որ ծրագրի իրականացումը բեկումնային կլինի համակարգի զարգացման համար:

Միջոցառումից հետո, լրագրողների խնդրանքով անդրադառնալով էլեկտրոնային հաշվետվությունների ներկայացման համակարգում առկա տեխնիկական խնդիրներին, ՊԵԿ նախագահը հայտարարել է. «Մեր տեղեկատվական էլեկտրոնային համակարգը լիարժեք գործում է, հաշվետվություն ներկայացնելու համար քաղաքացիները պետք է ներկայացնողի անձը հաստատող համապատասխան հավաստումը ստանան ոստիկանության անձնագրային համակարգից: Այս երկու համակարգերի միացման ժամանակ առաջ են եկել տեխնիկական խնդիրներ, որոնց ուղղությամբ ներկայում շտկման աշխատանքներ են տարվում: Վարչական տուգանքներ չեն կիրառվի մինչեւ համակարգի՝ բնականոն աշխատանքին անցումը»: