Ռուսաստանն այսօր նշում է Հայրենիքի պաշտպանի տոնը

Փետրվարի 23-ին Ռուսաստանում նշվում է հայրենիքի պաշտպանի օրը: ԽՍՀՄ-ում այն նշվում էր որպես խորհրդային բանակի և ռազմածովային ուժերի օր: Այս մասին նշում է Ria Novosti գործակալությունը:

Տոնի պատմագրությունը կապվում է 1918 թվականի հետ: 1918-ի հունվարի 28-ին Ժողովրդական կոմիսարների խորհուրդը Լենինի գլխավորությամբ ընդունեց հրամանագիր Կարմիր բանակի ստեղծման մասին, իսկ փետրվարի 23-ին տեղի ունեցան բազմահազարանոց ցույցեր Պետրոգրադում՝ նվիրված «սոցիալիստական հայրենիքը վտանգի մեջ է» կոչին: Այդ օրն աչքի ընկավ այն բանով, որ բազմաթիվ մարդիկ անդամագրվեցին Կարմիր բանակին: 

1919 թվականի փետրվարի 23-ին Խորհրդային Միությունում առաջին անգամ նշվեց հայրենիքի պաշտպանի օրը, որը, սակայն, 1920 և 1921 թվականներին չնշվեց: 

Առաջին անգամ ռազմական շքերթը տեղի է ունեցել 1922 թվականի փետրվարի 23-ին ռազմական հեղափոխական խորհրդի նախագահ Լև Տրոցկու հրամանագրով: 

Խորհրդային Միության փլուզումից հետո՝ 1995 թվականի մարտի 13-ին, ընդունվեց պետական օրենք, որի համաձայն՝ փտրվարի 23-ը պաշտոնապես ընդունվեց որպես «Գերմանիայի նացիստական զորքերի դեմ Կարմիր բանակի հաղթանակի և հայրենիքի պաշտպանի օր», իսկ 2006 թվականի ապրիլի 15-ի օրենքով Գերմանիայի նացիստական զորքերի դեմ Կարմիր բանակի հաղթանակի հատվածը հանվեց տոնի պաշտոնական անվանումից: