Ռուս սպառողների վերահսկողությունը հետ կկանչի իր պատվիրակությունը Վրաստանից Սաակաշվիլիի պատճառով

Վրաստանի նախագահ Միխայիլ Սաակաշվիլին հարց է բարձրացրել այն մասին, թե ինչու է ռուս սպառողների վերահսկողությունը ստուգում այն վրացական գինու և հանքային ջրի արտադրողներին, ովքեր պատրաստվում են վերականգնել իրենց ապրանքի արտահանումը Ռուսաստան:

«Ռուս սպառողների վերահսկողության նախագահ Օնիշենկոն չի բարեհաճել ժամանել Վրաստան, քանի որ նրա խոսքերով՝ մենք ծույլ ազգ ենք, սակայն ժամանել է նրա պատվիրակությունը, իսկ մեր պաշտոնյաները թաթերի վրա ծառայում են նրանց և դողացող ձեռքերով գինի մատակարարում»,-երեքշաբթի օրը ճեպազրույցի ժամանակ հայտարարել է Սաակաշվիլին:

Ռուս սպառողների վերահսկողության փորձագետները Վրաստան պետք է ժամանեին դեռևս փետրվարի սկզբին, սակայն ձգձգվող համաձայնեցումների ձեռքբերման պատճառով այցը հետաձգվել էր մի քանի շաբաթով: Ռուս սպառողների վերահսկողության նախագահ Գենադի Օնիշենկոն այն ժամանակ հայտարարել էր, թե «այդ ձգձգումները բացատրվում են ծուլությամբ և վրացական կողմի անկազմակերպվածությամբ»:

Սաակաշվիլին ճեպազրույցի ժամանակ իր զարմանքն է արտահայտել այն հարցի կապակցությամբ, որ վրացական գինին առհասարակ ստուգման է ենթարկվում: «Եթե բավարական երշիկը ռուսական շուկա է մտնում, ոչ ոք Ռուսաստանից չի մեկնում Բավարիա՝ ստուգողական վերահսկողություն անցկացնելու: Այս դեպքում մենք, ինչ է, նորի՞ց ենք վերադառնում ԽՍՀՄ: Ինչո՞ւ մենք ոչ մի կերպ չենք կարողանում դուրս գալ այդ դարաշրջանից»,-հայտարարել է Սաակաշվիլին:

Իր հերթին ռուսական կողմից Ռուս սպառողների վերահսկողության նախագահը հայտարարել է, որ ինքը հետ կկանչի իր պատվիրակությունը, եթե Սաակաշվիլին չդադարի վիրավորական արտահայտություններ թույլ տալ Վրաստանում ռուս փորձագետների ներկայության հարցի առընչությամբ:

«Եթե իրավիճակը չկարգավորվի, ապա մենք կդնենք հարցն ընդհուպ մինչև պատվիրակության հետկանչը»,-հայտարարել է Ռուս սպառողների վերահսկողության նախագահ Գենադի Օնիշենկոն. փոխանցում է Интерфакс-ը: