Եկամտային հարկի ամփոփ հաշվարկի վերաբերյալ

2013 թվականի հունվարի 1-ից ուժի մեջ մտած «Եկամտային հարկի մասին» Հայաստանի Հանրապետության օրենքի 13-րդ հոդվածի համաձայն' հարկային գործակալները պարտավոր են յուրաքանչյուր ամսվա համար այդ ամսվան հաջորդող ամսվա 20-ից ոչ ուշ բացառապես էլեկտրոնային եղանակով հարկային մարմիններ ներկայացնել սահմանված ձևի եկամտային հարկի ամփոփ հաշվարկ:

Նոր հաշվետվության տեսակի ավելացմամբ կտրուկ աճել են էլեկտրոնային հաշվետվություններ ներկայացնող հարկատուների քանակը, և այդ աճի արդյունքում ի հայտ են եկել ՀՀ ԿԱ ՀՀ ոստիկանության, ՀՀ բնակչության պետական ռեգիստրի համակարգի և ՀՀ ԿԱ ՊԵԿ հարկային հաշվետվությունների ներկայացման էլեկտրոնային համակարգի միջև անխափան աշխատանքի հետ կապված տեխնիկական խնդիրներ, որոնք առնչություն չունեն հարկային մարմնի տեղեկատվական համակարգի գործունակության հետ:

Հիմք ընդունելով «Վարչական իրավախախտումների վերաբերյալ» ՀՀ օրենսգրքի 9-րդ հոդվածը, որով տրվում է վարչական իրավախախտման հասկացությունը, տեղեկացվում է, որ հունվար ամսվա համար նախատեսված էլեկտրոնային հաշվետվությունները ուշացումով (մինչև մարտի 7-ը ներառյալ) ներկայացրած հարկատուների նկատմամբ չեն կիրառվելու վարչական պատասխանատվության միջոցներ: