Հեռակոնֆերանս՝ նախարարության և «Էրեբունի» հայկական մշակութային կենտրոնի միջև

Մարտի 6-ին տեղի ունեցավ հեռակոնֆերանս ՀՀ սփյուռքի նախարարության և Ղազախստանի Կոստանայ քաղաքի հայ համայնքի ներկայացուցիչների միջև, որին մասնակցում էին ՀՀ սփյուռքի նախարարի տեղակալներ Վ. Ջիլավյանը և Դ. Կարապետյանը, նախարարության աշխատակազմի կառուցվածքային ստորաբաժանումների ղեկավարներ, աշխատակիցներ: Կոստանայից մասնակցում էին Ղազախստանի Հանրապետության «Նաիրի» հայկական մշակութային կենտրոնների միավորման նախագահի տեղակալ Շանթ Մկրտչյանը, «Էրեբունի» մշակութային կենտրոնի նախագահ Արթուր Աբրահամյանը, Կոստանայի կիրակնօրյա հայկական դպրոցի ուսուցիչներ:

ՀՀ սփյուռքի նախարարության աշխատակազմի համահայկական ծրագրերի վարչության պետ Ա. Մխիթարյանը ներկայացրեց 2013թ իրականացվելիք նախարարության համահայկական ծրագրերը, դրանց մասնակցության պայմանները՝ կոչ անելով ակտիվացնել մասնակցությունը:

Կոստանայի կիրակնօրյա հայկական դպրոցի ուսուցչուհի Գ. Չիչոյանը ներկայացրեց մայրենի լեզվի և պատմության դասավանդման դժվարությունները: ՀՀ սփյուռքի նախարարությունը պատրաստակամություն հայտնեց դպրոցին տրամադրել այբբենարաններ, ուսումնաօժանդակ նյութեր, ուսումնամեթոդական ձեռնարկներ, բառարաններ: Համայնքի ներկայացուցիչների խնդրանքով Կոստանայ քաղաքի «Էրեբունի» հայկական մշակութային կենտրոնին կառաքվեն նաև հայկական տարազներ:

Համայնքի ներկայացուցիչների հետ քննարկվեցին «Ցեղասպանության 100-րդ տարելիցին ընդառաջ» միջոցառումների շրջանակում համայնքի կողմից իրականացվելիք հետագա ծրագրերը: