ՀՀ սփյուռքի նախարարը հանդիպեց ՀՀ բուհերում սովորող սիրիահայ ուսանողներին

Մարտի 11-ին ՀՀ սփյուռքի նախարար Հրանուշ Հակոբյանը հանդիպեց Հայաստանի բուհերում սովորող սիրիահայ ուսանողների խորհրդի անդամների հետ:

Ծանոթանալով ուսանողների խնդիրներին՝ նախարար Հ. Հակոբյանը ողջունեց տարբեր բուհերի սիրիահայ ուսանողական խորհուրդների ստեղծումը:

Նախարարն առաջարկեց խորհրդի անդամներին բացահայտել սիրիահայ ուսանողների խնդիրները և ներկայացնել ՀՀ սփյուռքի նախարարություն, որպեսզի առավել արդյունավետ կերպով հնարավոր լինի զբաղվել դրանց լուծմամբ:

Նախարար Հ. Հակոբյանը հայտնեց նաև, որ Մասիսի, Աշտարակի և Վաղարշապատի քաղաքապետերի հետ նախնական պայմանավորվածություն է ձեռք բերվել քաղաքներում սիրիահայերի համար թաղամասերի կառուցման վերաբերյալ: Այս պահին քննարկվում են ֆինանսական միջոցների ձեռքբերման խնդիրներ: Առկա են առաջին հովանավորները: Նոր բնակարանների կառուցման հարցում ծախսերի մի մասը հոգալու են հենց սիրիահայ շահառուները:

Գերատեսչության ղեկավարը ներկայացրեց ՀՀ սփյուռքի նախարարության առաջիկա ծրագրերն ու միջոցառումները, կոչ արեց բուհերում սիրիահայ ուսանողական խորհուրդներին առավել ակտիվ մասնակցել դրանց իրականացմանը: