Սիրիահայերի հիմնախնդիրների մասին

Մարտի 13-ին ՀՀ սփյուռքի նախարարությունում տեղի ունեցավ Սիրիահայերի հիմնախնդիրները համակարգող միջգերատեսչական հանձնաժողովի հերթական նիստը: Հանձնաժողովի նախագահ Հրանուշ Հակոբյանը ողջունեց գերատեսչությունների ներկայացուցիչներին՝ կարևորելով սիրիահայերի հիմնախնդիրների լուծմանն ուղղված նրանց համատեղ ջանքերն ու գործելու պատրաստակամությունը:

Նիստի ընթացքում զեկույցով հանդես եկավ Երևանի քաղաքապետարանի աշխատակազմի սոցիալական ապահովության վարչության պետ Ռուզաննա Զաքարյանը: Նա ներկայացրեց երևանաբնակ սիրիահայ ընտանիքների սոցիալական աջակցության ծրագրի շրջանակներում քաղաքապետարանի կողմից իրականացված աշխատանքները: Ռ. Զաքարյանը նշեց, որ սիրիահայերի համար իրականացվող ծրագրերն առավել հասցեական և նպատակային դարձնելու համար կատարվել է սոցիալական-վիճակագրական վերլուծություն, գնահատվել են կարիքներն ու առաջնահերթությունները: Այս ուսումնասիրության համաձայն մեկ անգամ ևս հաստատվել է, որ սիրիահայերի համար առաջնահերթ են բնակարանային և աշխատանքի տեղավորման հարցերը: Մինչև օրս 156 սիրիահայ ընտանիք Երևանի քաղաքապետարանից դրամական աջակցություն՝ բնակարանային վարձավճարի, դեղորայքի տեսքով օգնություն է ստացել: 215 ընտանիք ստացել է կենցաղային իրեր, 66 ընտանիք պարենային մթերքների տեսքով օգնություն: Ներկայումս 11 ընտանիք օգտվում է բարեգործական ճաշարաններից, 31 տարեց ստանում է կենսաթոշակ:

Երևանի քաղաքապետարանի աշխատակազմի կրթության վարչության պետ Գայանե Սողոմոնյանը ներկայացրեց սիրիահայերի համար նախատեսված կրթական ծրագրերը՝ առանձնացելով ՀՀ սփյուռքի նախարարության աջակցությամբ 2012 թվականի ամռանը կազմակերպված արևելահայերենի արագացված ուսուցման ծրագիրը, ինչպես նաև՝ հոկտեմբեր ամսին Երևանի թիվ 14 դպրոցում ստեղծված սիրիական կրթական ծրագրով գործող «Կիլիկյան» դպրոցը, որտեղ դասավանդում են սիրիահայ ուսուցիչներ: Այժմ դպրոցում սովորում է 370 աշակերտ:

ՀՀ սփյուռքի նախարարության Մերձավոր և միջին Արևելքի վարչության պետ Լուսինե Ստեփանյանը ներկայացրեց վերջին 2 ամիսներին ՀՀ գերատեսչությունների, այդ թվում՝ ՀՀ սփյուռքի նախարարության իրականացրած աշխատանքները:

ՀՀ առողջապահության նախարարի տեղակալ Հայկ Դարբինյանը փաստեց, որ սրտային հիվանդությունների հետազոտումը սիրիահայերի համար ևս անվճար է, անհրաժեշտության դեպքում պոլիկլինիկաներում անվճար կարգով կտրամադրվեն նաև 150 անուն դեղեր:

Նիստը ամփոփեց ՀՀ սփյուռքի նախարար Հ. Հակոբյանը: Որոշվեց Երևանի քաղաքապետարանի կրթության վարչության հետ համատեղ՝ սիրիահայերի համար լեզուների ուսուցման կենտրոն բացել, որտեղ կկազմակերպվեն արևելահայերենի, ռուսերենի և, ցանկության դեպքում նաև այլ լեզուների արագացված դասընթացներ: Նախարարը նշեց, որ նախնական քննարկման փուլում է սիրիահայերի համար, իրենց մասնակցությամբ երևանամերձ մի շարք բնակավայրերում բնակարաններ կառուցելու հարցը:

Նիստի ավարտին հաստատվեց Սիրիահայերի հիմնախնդիրները համակարգող միջգերատեսչական հանձնաժողովի 2013 թվականի աշխատանքային ծրագիրը: