Խիստ հսկողություն՝ փաստաթղթաշրջանառության նկատմամբ

Պետական եկամուտների կոմիտեի՝ վերջին տարիներին իրականացրած բարեփոխումների հիմքում բիզնեսի համար առավելագույն հարմարավետ պայմանների ապահովումն է: Առաջնորդվելով այս սկզբունքով՝ կոմիտեն որդեգրել է ինչպես բիզնեսի, այնպես էլ ոլորտում հիմնական դերակատարում ունեցող հասարակական կազմակերպությունների հետ խնդիրները, վարչարարական նոր մոտեցումները համատեղ քննարկելու գործելաոճ: Կարևորելով նրանց դերը փաստաթղթաշրջանառության ապահովման գործում՝ կոմիտեում այսօր հանդիպում էր կազմակերպվել, որի նպատակը գործընթացի կարգավորման վարչարարական և օրենսդրական խնդիրներին հասարակական կազմակերպություններին մասնակից դարձնելն էր: «Փաստաթղթաշրջանառության կարգավորման խնդիրը նոր չէ. այդ ուղղությամբ անցած տարիներին նկատելի առաջընթաց ենք արձանագրել, պարզապես հարցն այսօր ավելի խիստ է դրված, քանի որ հարկային վարչարարության և ընթացակարգերի բարեփոխմանն ուղղված միջոցառումների արդյունքը մեզ արդեն հնարավորություն է տալիս համալիր հսկողության միջոցով ավելի արդյունավետ պայքարել առանց փաստաթղթի ապրանքաշրջանառության դեմ: Պայքարի ուղիները գտնված են. հանրապետության ամբողջ տարածքում պետք է խաղի մեկ՝ միասնական կանոն գործի, բոլորը պետք է աշխատեն փաստաթղթաշրջանառության հստակ սահմանված ընթացակարգերով»: Անդրադառնալով տնտեսավարման հավասար պայմանների ապահովման խնդրին՝ ՊԵԿ նախագահը նշել է, որ արդեն իսկ ներդրվել է «օրինապահ» հարկ վճարողների խրախուսման մեխանիզմ, ինչը հարկատուին հնարավորություն է տալիս ինքնուրույն գնահատել իր աշխատանքը. «Այս մոտեցումը նոր մշակույթ է և մեծ հնարավորություն բիզնեսի համար: Եթե մեր ուսումնասիրությունները ցույց տան, որ տվյալ բիզնեսն իսկապես մաքուր է աշխատում, ՊԵԿ աշխատակիցները նրան չեն անհանգստացնի: Շատ կարևոր է, որպեսզի բիզնեսի և կոմիտեի միջև փոխադարձ վստահության մթնոլորտ ձևավորվի. գործարարը պետք է համոզվի, որ մեր գործողությունները ոչ թե ժամանակավոր, այլ հետևողական բնույթ են կրում»,-նշել է կոմիտեի նախագահը:

ՊԵԿ նախագահի առաջին տեղակալ Արմեն Ալավերդյանի խոսքերով, ՀԿ-ների հետ հանդիպման նախաձեռնությունը ՊԵԿ-ինն է. «Նպատակն է հասարակության բոլոր կողմերին մոտեցնել խնդրին, ներկայացնել, որ երկրում ստվերային տնտեսությունը և առանց փաստաթղթերի աշխատելը նույն երևույթներն են, հետևաբար ցանկացած միջոցառում և գործողություն, որն ուղղված է այս խնդրի կարգավորմանը, հավասարազոր է ստվերի կրճատմանը»:

Նշենք, որ ՀԿ-ների հետ հանդիպմանը նախորդել է ընդլայնված կազմով ՊԵԿ նախագահի անցկացրած աշխատանքային խորհրդակցությունը, որի ընթացքում Գագիկ Խաչատրյանը հստակ հանձնարարականներ է տվել պատասխանատու ստորաբաժանումների ղեկավարներին: Ըստ այդմ, փաստաթղթաշրջանառության հսկողության միջոցառումների շրջանակում նախատեսվում է պարբերաբար վերլուծություններ իրականացնել' ըստ ոլորտների, ապրանքատեսակների և հարկային տեսչությունների, մշակել վարչարարական և օրենսդրական առաջարկություններ, գերատեսչական հսկողության ծրագիր և մշտադիտարկում իրականացնել:

Հայաստանի արդյունաբերողների և գործարարների միության նախագահ Արսեն Ղազարյանի խոսքերով, ստվերային տնտեսության դեմ պայքարի արդյունավետ միջոցը չփաստաթղթավորված շրջանառության բացահայտումն ու նվազեցումն է. «Անցյալ տարեվերջին կատարված օրենսդրական փոփոխություններով ավելի խստացվեց օպերատիվ գործողությունների միջոցով խախտումների բացահայտումը: Եթե գործարարությունը համոզված լինի, որ նման խիստ մեթոդները կիրառվելու են բոլորի հանդեպ, ապա, եվրոպական շատ երկրների նման, մենք էլ կունենանք այն մոտեցումը, ըստ որի անհնար է պատկերացնել տնտեսական գործառույթ՝ առանց փաստաթղթի»: Հանդիպման ավարտին ՊԵԿ նախագահն ընդգծել է հասարակական կազմակերպությունների հետ ոլորտի խնդիրները քննարկելու, հետաքրքրող հարցերը պարզաբանելու և համատեղ լուծումներ գտնելու կարևորությունը և պատրաստակամություն է հայտնել ձևաչափը դարձնել պարբերական: