Ախալքալաքի հայերի պատճառով լարվել են Վրաստանի նախագահի և վարչապետի հարաբերությունները. Грузия online

Վրաստանում բնակվող հայերը երկրի իշխանություններից պահանջել են անմիջապես վավերացնել տարածաշրջանային լեզուների մասին Եվրոպական կանոնադրությունը։ Դա նոր սրացում է առաջ բերել նախագահ Սաակաշվիլիի և վարչապետ Իվանիշվիլիի հարաբերություններում: Պետության ղեկավարը հայտարարել է, որ կանոնադրության վավերացումը սպառնում է ազգային անվտանգությանը, և մեղադրել է կառավարությանը հայ ազգայնականներին կուլ գնալու համար, գրում է Грузия online-ը:

Տարածաշրջանային լեզուների մասին եվրոպական կանոնադրությունը վավերացնելու կոչը հնչել է գերազանցապես հայերով բնակեցված Սամցխե Ջավախեթի շրջանում: Տեղի խորհրդարանի ղեկավար Համլետ Մովսիսյանը հայտարարել է. «Մենք պնդում ենք, որ խորհրդարանը վերջապես ընդունի 1999-ին Վրաստանի կողմից ընդունված Եվրոպական կանոնադրության այդ դրույթը»:

Իվանիշվիլիի կառավարությունը հիշեցնում է, որ Եվրոպական կանոնադրությանը միանալու նախաձեռնությունը պատկանել է Սաակաշվիլիին: «1999-ին Սաակաշվիլին, լինելով իրավական հարցերով խորհրդարանական հանձնաժողովի նախագահը, անպատասխանատու կերպով իր վրա վերցրեց այդ փաստաթղթի վավերացումը,-հայտարարել է վերաինտեգրման հարցերով նախարար Պատա Զաքարեիշվիլին և հավելել,- Սաակաշվիլին այն ժամանակ այնքան էր շտապում առաջ անցնել Հայաստանից և Ադրբեջանից, որ չմտածեց դրա հետևանքների մասին»: Զաքարեիշվիլին վստահ է, որ այժմ իր երկիրն այլընտրանք չունի, քան վավերացնել կանոնադրությունը, հակառակ դեպքում իրենք չեն տեսնի Վրաստանի եվրաինտեգրումը:

Ընդդիմադիր «Միասնական ազգային շարժման» առաջնորդներն իրենց հերթին պահանջում են մեղքը իրենց վրա չբարդել: «Փոխանակ մեզ հիշեցնեն 1999-ի կանոնադրությունը՝ ավելի լավ կլինի, եթե «Վրացական երազանք»-ը մտածի իր ներկայիս պատասխանատվության մասին, քանի որ այժմ ոչ թե մենք, այլ հենց նրանք պետք է որոշում կայացնեն»,-հայտարարել է «Միասնական շարժման» առաջնորդներից Դավիդ Դարչիաշվիլին և նշել, որ արտաքին քաղաքական ռիսկեր ունեցող Վրաստանի համար շատ վտանգավոր է այդ կանոնադրության վավերացումը ազգային անվտանգության տեսակետից: