Տիգրան Սարգսյանին չեն գոհացնում ԱՎԾ ցուցանիշները

Կառավարության այսօրվա նիստում մինչ օրակարգային հարցրերին անցնելը վարչապետ Տիգրան Սարգսյանն անդրադարձավ ԱՎԾ-ի կողմից հրապարակված հունվար-փետրվար ամիսների ցուցանիշներին:

«Մենք տեսնում ենք, որ բավականին բարձր ցուցանիշներով ենք սկսել այս տարին, և գնահատում ենք տնտեսական աճի ցուցանիշը: Բայց երբ ծանոթանում ենք տնտեսական աճի կառուցվածքին, տեսնում ենք, որ դեռևս կան խնդիրներ: Մեզ ուրախացնում է այն հանգամանքը, որ արդյունաբերությունը շարունակում է բարձր ցուցանիշներ դրսևորել, և մենք պետք է պահպանենք այդ տեմպերը: Բայց մտահոգիչ է շինարարության ցուցանիշը: Նախորդ տարի մենք առաջին անգամ կասեցրեցինք անկման միտումը շինարարության ոլորտում և արձանագրեցինք տարվա արդյունքներով կեստոկոսանոց աճ: Հունվար-փետրվար ամիսներին մենք շինարարությունում արձանագրել ենք անկում շուրջ 8 տոկոսային կետով և հասկանալի է, որ այս տարվա տնտեսական աճի ցուցանիշն ապահովելու համար մեզ անհրաժեշտ է շինարարության ոլորտում իրականացնել պետական ծրագիր, հակառակ պարագայում մենք չենք կարող ունենալ այդ ոլորտում բարձր աճի տեմպեր»,-ասաց վարչապետը:

Գործադիրի ղեկավարը հանձնարարական տվեց շինարարության ոլորտի վերաբերյալ մեծ խորհրդակցություն կազմակերպել. «Հրավիրե՛ք այդ ոլորտի ակտիվ մասնակիցներին, և պետք է հասկանանք, թե պետությունն ինչով պետք է օժանդակի, ինչ քայլեր մենք պետք է ձեռնարկենք, որպեսզի այդ ոլորտում վերականգնենք աճի նորմալ ծավալներ»,-ասաց Տիգրան Սարգսյանը: