Խորհրդակցություն ՀՀ գյուղատնտեսության նախարարությունում

Ի կատարումն ս.թ.-ի ապրիլի 4-ի ՀՀ կառավարության նիստում ՀՀ վարչապետ Տիգրան Սարգսյանի տված հանձնարարականի, ապրիլի 12-ին ՀՀ գյուղատնտեսության նախարարությունում կայացավ համատեղ քննարկում՝ նվիրված ընթացիկ տարվա պտուղ-բանջարեղենի և խաղողի արտադրության, մթերումների և իրացման կազմակերպման հետ կապված խնդիրներին: Խորհրդակցությանը, ՀՀ գյուղատնտեսության նախարարի պաշտոնակատար Սերգո Կարապետյանից, ՀՀ էկոնոմիկայի նախարարի պաշտոնակատար Տիգրան Դավթյանից, Կենտրոնական բանկի փոխնախագահ Ներսես Երիցյանից բացի, մասնակցում էին նաև պտուղ-բանջարեղեն և խաղող վերամշակող ու արտահանող ընկերությունների, ոլորտի գործունեությանն առնչվող ՓՄՁ ներդրումներ ՈՒՎԿ-ի, Հայաստանի ՓՄՁ ԶԱԿ և Արդյունաբերության զարգացման հիմնադրամների ներկայացուցիչներ:

Նշվեց, որ ոլորտում գործող մասնավոր հատվածի ներկայացուցիչների մասնակցությամբ այն նախօրոք ուսումնասիրվել և քննարկվել է ՀՀ գյուղատնտեսության նախարարությունում, որի արդյունքում լուծման անհրաժեշտություն ունեցող հարցերը ամփոփ տեսքով ներկայացվել են այսօրվա քննարկմանը:

Ելույթ ունեցողներն անդրադարձան արտադրանքի արտահանման և ռազմավարական շուկաներ մուտք գործելու հարցերում պետական աջակցության, առևտրային բանկերի կողմից վարկային միջոցների տրամադրման պայմանների, անհրաժեշտության դեպքում գործող վարկերի մարման ժամկետների երկարաձգման, գինենյութի պահման տարաներ, ինչպես նաև օժանդակ հումք (շիշ, խցան և այլն) ներկրելու ժամանակ ավելացված արժեքի հարկի և մաքսատուրքի վճարումից ազատման կամ դրանց վճարումը հետաձգելու և նման բազմաթիվ այլ խնդիրների:

ՀՀ էկոնոմիկային նախարարի պաշտոնակատար Տիգրան Դավթյանը անդրադարձավ գործող և առաջիկայում նախատեսվող պետական աջակցության գործիքներին, հատկապես արտահանման, շուկայավարման և միջազգային ցուցահանդեսների մասնակցության մասով:

Կենտրոնական բանկի փոխնախագահ Ներսես Երիցյանը ներկայացրեց վարկավորման համակարգում առկա իրավիճակը, նշելով, որ առաջիկայում առևտրային բանկերը հնարավորություն կունենան տրամադրելու մեծ ծավալի վարկեր՝ ՀՀ դրամով:

Ամփոփելով քննարկումը՝ ՀՀ գյուղատնտեսության նախարարի պաշտոնակատար Սերգո Կարապետյանը նշեց գյուղացիական տնտեսությունների կողմից արտադրվող բերքի իրացման կարևորությունը և վերամշակող ու արտահանող ընկերությունների մեծ դերակատարությունն այդ հարցում. «Այս քննարկումով մեր հանդիպումները չեն ավարտվելու: Մինչև բերքաշրջանի ու մթերումների ավարտը մենք նման բազմաթիվ հանդիպումներ ենք ունենալու՝ փորձելով հնարավորինս աջակցել ոլորտի գործունեության կարգավորմանը, պետություն –մասնավոր հատված համագործակցության ամրապնդմանը: Պետությունն այսօր մեծ օժանդակություն է ցուցաբերում և՛ գյուղացուն, և՛ վերամշակողին: Բնական է , քանի որ թե՛ արտադրությունը, թե՛ վերամշակումը համաչափ պետք է զարգանան: Սակայն, ցավոք, դեռևս լուրջ անելիքներ կան որակի ապահովման բնագավառում, և սա էլ խոչընդոտում է մեր արտադրանքի արտահանմանը դրսի շուկաներ»,- նշեց Սերգո Կարապետյանը: Նա հատուկ անդրադարձավ պայմանագրային հիմունքներով աշխատանքների կազմակերպմանը և հորդորեց հնարավորինս արագ սկսել վերամշակողների և գյուղացիների միջև բերքի իրացման պայմանագրերի կնքումը:

Քննարկման արդյունքները կներկայացվեն կառավարություն՝ համապատասխան ընթացք տալու համար: