Պարզաբանում է ոստիկանությունը

Զանգվածային լրատվության միջոցների հարցմանն ի պատասխան' հայտնում ենք, որ, «Նույնականացման քարտերի մասին» ՀՀ օրենքի 3-րդ հոդվածի 1-ին մասի համաձայն քաղաքացին նույնականացման քարտ ստանում է կամավոր' 16 տարին լրանալու օրվանից: Անհրաժեշտ է նշել, որ նույնականացման քարտ չստանալու կամ առանց նույնականացման քարտի բնակվելու համար ՀՀ օրենսդրությամբ պատասխանատվության միջոցներ նախատեսված չեն:

Այլ է խնդիրը, եթե որևէ իրավունքից օգտվելու համար անհրաժեշտ լինի նույնկանացման քարտի առկայություն: ՀՀ ոստիկանությունը չի համարվում պարտադիր կուտակային կենսաթոշակային համակարգը վարող լիազոր մարմին: Ուստի առաջարկվում է նշված հարցի պատասխանը ստանալու համար դիմել իրավասու մարմնին: Բոլոր դեպքերում «Նույնականացման քարտերի մասին» ՀՀ օրենքով նույնականացման քարտ ստանալու վերաբերյալ պարտադիր դրույթներ նախատեսված չեն: Նշված օրենքի 8-րդ հոդվածի 3-րդ մասի համաձայն մինչև 2014 թվականի հունվարի 1-ը և օրենքով նախատեսված դեպքերում 2014 թվականի հունվարի 1-ից հետո տրված՝ Հայաստանի Հանրապետության կառավարության 1998 թվականի դեկտեմբերի 25-ի թիվ 821 որոշմամբ նախատեսված անձնագրերը համարվում են վավերական Հայաստանի Հանրապետության տարածքում և Հայաստանի Հանրապետության տարածքից դուրս մինչև դրանց վավերականության ժամկետը լրանալը: Մինչև անձնագրի վավերականության ժամկետը լրանալը քաղաքացին օրենքով սահմանված կարգով կարող է ստանալ նաև նույնականացման քարտ, ինչպես նաև «Հայաստանի Հանրապետության քաղաքացու անձնագրի մասին» Հայաստանի Հանրապետության օրենքով սահմանված կարգով՝ նշված օրենքով նախատեսված անձնագիր, և իր ցանկությամբ նրան վերադարձվում է Հայաստանի Հանրապետության կառավարության 1998 թվականի դեկտեմբերի 25-ի թիվ 821 որոշմամբ նախատեսված վավերական անձնագիրը:

Անձնագրի վավերականության ժամկետը լրանալու դեպքում մինչև 16 տարեկան, ինչպես նաև 16-18 տարեկան արական սեռի զինապարտ ՀՀ քաղաքացիները կարող են ստանալ Հայաստանի Հանրապետության կառավարության 1998 թվականի դեկտեմբերի 25-ի թիվ 821 որոշմամբ նախատեսված անձնագիր (այսինքն սովորական անձնագիր): 16 տարեկանից բարձր մյուս կատեգորիայի անձանց անձնագրի վավերականության ժամկետը լրանալու դեպքում անձը հաստատող փաստաթուղթ ստանալու համար անձը պետք է ստանա նույնականացման քարտ՝ ՀՀ տարածքում օգտագործելու համար, իսկ ճամփորդելու համար՝ նաև կենսաչափական տվյալներ պարունակող անձնագիր:

Նույնականացման քարտ ստանալու համար «Պետական տուրքի մասին» ՀՀ օրենքի 14-րդ հոդվածի 1.2-րդ մասով սահմանված է պետական տուրքի վճարում 3.000 ՀՀ դրամի չափով: Նշված վճարից ազատվում են աղքատության ընտանեկան նպաստ ստացող ընտանիքի անդամ' Հայաստանի Հանրապետության քաղաքացիները և առաջին անգամ նույնականացման քարտ ստացող Հայաստանի Հանրապետության այն քաղաքացիները, որոնք 16 տարին լրանալուց հետո չեն ստացել Հայաստանի Հանրապետության քաղաքացու անձնագիր:

Առավել սեղմ ժամկետում նույնականացման քարտ ստանալու կամ փոխանակելու համար բացի նշված վճարից ՀՀ քաղաքացին վճարելու է ՀՀ կառավարության 2008 թվականի դեկտեմբերի 11-ի թիվ 1465-Ն որոշմամբ սահմանված վճարը՝ 1 աշխատանքային օրվա համար 20.000 ՀՀ դրամի, իսկ 3 աշխատանքային օրվա համար 10.000 ՀՀ դրամի չափով: Նույնականացման քարտի համար ՀՀ օրենսդրությամբ սահմանված վճարները տնօրինվում են ՀՀ օրենսդրության համաձայն հաստատված նախահաշիվների հիման վրա՝ համապատասխան տողերով: Ընդ որում անհրաժեշտ է նշել, որ արտաբյուջետային միջոցները ևս համարվում են պետական բյուջեի համամասնություն և գանձված բոլոր միջոցները ծախսվում են պետական կարիքների համար: