Սարդարապատի թանգարանը կարդիականացվի նոր տեխնոլոգիաներով

Հայոց ազգագրության և ազատագրական պայքարի պատմության ազգային «Սարդարապատ» թանգարանի տնօրեն Կարեն Արիստակեսյանը թանգարանի առաջնային խնդիրներից է համարում տեղեկատվական նոր տեխնոլոգիաների ներդրումը թանգարանում:

Լրագրողների հետ հանդիպմանը թանգարանի տնօրեն Կարեն Արիստակեսյանը նշեց, որ հաստատության առաջնային խնդիրների նոր ցուցադրության հայեցակարգի ստեղծումն է և նոր ցուցադրության փուլային կայացումը: «Այս հարցում մեզ կօգնեն նոր տեխնոլոգիաները, որոնք շատ կարևոր են թանգարանների հավաքածուները և առարկաները հանրամատչելի դարձնելու առումով»,- նշեց Արիստակեսյանը' ընդգծելով, որ սա ենթադրում է նաև համապատասխան մասնագետի առկայություն, որը կվարի թանգարանային հավաքածուի էլեկտրոնային շտեմարանը:

Տնօրենն այս նորարարությունը կարևոր համարեց հատկապես այն առումով, որ այսօր թանգարանի պահոցները վերածվել են պահեստների, իսկ թանգարանը պահեստավորման խնդիր պիտի չունենա, այլ ունենա լավ դասակարգված պահոցներ, լավ մշակված հարցարաններ, այդ թվում` էլեկտրոնային, և վարի գիտական արդյունավետ ու համակարգված գործունեություն:

Ըստ նրա` թանգարանային առարկաները պետք է «կենդանացվեն», ինչը հնարավոր է ֆիլմերի, երաժշտության միջոցով: Մասնավորապես, ֆինանսական միջոցների առկայության պարագայում (10 միլիոն 500 հազար դրամ) թանգարանը ծրագրել է նոր ցուցադրություն կազմակերպել ազգային նվագարանների հնչեցմամբ, որն այցելուներին հնարավորություն կտա ծանոթանալ հայ ազգային երաժշտությանը և ավելի կաշխուժացնի թանգարանային կյանքը: Թանգարանում պահվում է նվագարանների ամենամեծ հավաքածուն, որ ժամանակին բերվել և հավաքվել է այլ թանգարաններից:

Նախատեսվում է առաջիկա տարիներին թանգարանում ունենալ նաև աուդիոգիդերի ծառայություն, ինչպես նաև տոմսերի էլեկտրոնային վաճառք: «Կարծում եմ, որ նոր տեղեկատվական տեխնելեգիաների մասով մենք հնարավորություն կունենանք համագործակցել Orange Armenia-ի հետ»,- ավելացրեց նա:

2013 թվականին թնագարանն ունեցել է 25784 այցելու. 2004 թվականից ի վեր թանգարանի այցելուների թիվն աճել է երկու անգամ: Թանգարանային գործունեության ցուցանիշները գնահատելու համար ընդունված է հաշվի առնել երկու ցուցանիշ` այցելուների քանակը և թանգարանային հավաքածուների ու առարկաների մատչելիությունը հասարակության համար:

Արդարապատի թանգարանն արդեն համալրվել է Հայաստանում առաջին թանգարանային մոնիտորով, որով ցուցադրվում է Հայկական լեռնաշխարհը, որը փոխարինում է Հայակական լեռնաշխարհի մակետին: Վերջինը, ըստ Արիստակեսյանի, ժամանակավրեպ և գիտական առումով խոցելի էր: Ապագայում նման մոնիտոր նախատեսվում է ունենալ թանգարանի մուտքի մոտ, որը համակարգչային ցանցի միջոցով կապահովի պահոցների ցուցադրումը, և կլինի պահուստային ֆոնդի յուրատեսակ բացօթյա ցուցադրություն:

«Այս ուղղությամբ քայլեր արդեն կատարվել են, սակայն չպետք է բավարարվենք ձեռք բերածով, այլ առաջնորդվենք թանգարանների միջազգային ու առաջավոր փորձով: Այս առումով անելիքները շատ-շատ են»,- հավելեց նա:

Լրատվամիջոցների ներկայացուցիչների համար մինչ ասուլիսը շրջայց կազմակերպվեց թանգարանի ցուցասրահներում և պահուստային ֆոնդերում:

Թանգարանը, որի ճարտարապետն է Ռաֆայել Իսրայելյանը, բացվել է 1978թ.: Թանգարանում ներկայացվում է հայ ժողովրդի էթնիկ մշակույթը և մայիսյան հերոսամարտերը: 2012թ-ի հունվարի 1-ից Հայոց ազգագրության և ազատագրական պայքարի պատմության ազգային թանգարանը համարվում է Թանգարանների միջազգային խորհրդի (ICOM) հիմնական անդամ: Թանգարանում գիտաօժանդակ նյութի հետ միասին պահպանվում է շուրջ 73934 մշակութային արժեքներ: 6500 քմ ցուցադրական մակերեսի վրա ներկայացվում է հայերի նյութական, սոցիալական ու հոգևոր մշակույթը հնագույն ժամանակներից մինչև մեր օրերը: Թանգարանում կազմակերպվում են հայոց ավանդական և ժամանակակից արվեստին, ինչպես նաև այլ ժողովուրդների էթնիկ մշակույթին վերաբերող ցուցահանդեսներ: