Դիետոլոգը բացատրել է՝ ինչու է առավոտյան սուրճից հետո քնկոտություն առաջանում

Դիետոլոգ Ալեքսանդր Լերիցը բացատրել է, թե ինչու է որոշ մարդկանց մոտ առավոտյան սուրճ խմելուց հետո քնկոտություն և հոգնածություն առաջանում։ TakeOut-ի հետ զրույցում մասնագետը նշել է, որ պատճառը կապված է կոֆեինի ազդեցության և դրա ավարտից հետո օրգանիզմում տեղի ունեցող փոփոխությունների հետ։

Լերիցի խոսքով՝ կոֆեինը ժամանակավորապես արգելափակում է ադենոզինի ընկալիչները։ Ադենոզինը նյութ է, որը պատասխանատու է քնկոտության առաջացման համար։ Սակայն երբ կոֆեինի ազդեցությունն ավարտվում է և այն դուրս է գալիս օրգանիզմից, ադենոզինը կրկին սկսում է ազդել, ինչի հետևանքով մարդը կարող է զգալ ուժեղ հոգնածություն։

Դիետոլոգը նշել է, որ նման ազդեցությունը հատկապես նկատվում է այն մարդկանց մոտ, ովքեր քիչ են քնում։ Նրա խոսքով՝ եթե մարդը գիշերը քնել է ընդամենը 4-5 ժամ և փորձում է սուրճով վերականգնել էներգիան, ապա կոֆեինի ազդեցության ավարտից հետո հոգնածությունը կրկին վերադառնում է։ Մասնագետը նաև զգուշացրել է, որ չափազանց շատ սուրճ օգտագործողները ավելի հաճախ կարող են բախվել նման խնդրի, քանի որ կոֆեինը միայն ժամանակավորապես է թաքցնում քնի պակասի և սթրեսի հետևանքները։