Ջուլիան Ասանժը պատմել է իր հարազատների դեմ ուղղված սպառնալիքների մասին

WikiLeaks կազմակերպության հիմնադիր Ջուլիան Ասանժը հայտարարել է, որ երկյուղում է իր հարազատների և մերձավորների անվտանգության համար: Նրա խոսքով՝ իր մոր և երեխաների հասցեին սկսել են անանուն սպառնալիքներ ստացվել այն բանից հետո, երբ ինքը թաքնվել է Մեծ Բրիտանիայի մայրաքաղաքում՝ էկվադորի դեսպանատանը: Այս մասին նա հայտնել է հունիսի 19-ին դեսպանատան շենքում կայացած մամուլի ասուլիսի ժամանակ, երբ լրացել է ուղիղ երկու տարի այն պահից, երբ Ասանժը թաքնվել է դիվանագիտական ներկայացուցչության տարածքում:

Ինչպես ավելի վաղ հայտնել է Daily Mail թերթը, Ասանժն ունի չորս երեխա, նրանցից ավագը 23 տարեկան է, կրտսերը՝ երեք: Ասանժը հայտարարել է, որ մտադիր չէ հեռանալ Էկվադորի դեսպանատնից, քանի որ այդ դեպքում իրեն կարող են հանձնել ԱՄՆ-ի իշխանություններին: Երկու տարվա ընթացքում դիվանագիտական ներկայացուցչության մուտքի մոտ շուրջօրյա հերթապահում են բրիտանացի ոստիկաններ, որոնք պատրաստ են կալանավորել WikiLeaks-ի հիմնադրին:

Տեսակապով Ասանժի մամուլի ասուլիսին մասնակցել է Էկվադորի արտաքին գործերի նախարար Ռիկարդո Պատինիոն: Նա հավաստիացրել է, որ Ասանժը կարող է անսահմանափակ ժամանակով ապրել դեսպանատանը, հաղորդել է ԻՏԱՌ-ՏԱՍՍ գործակալությունը: