ԵԽԽՎ-ն իր նստաշրջանում կընտրի գլխավոր քարտուղարին և կլսի Ուկրաինայի նախագահին

Եվրախորհրդի խորհրդարանական վեհաժողովի՝ հունիսի 23-ին Ստրասբուրգում բացվող ամառային նստաշրջանի գլխավոր թեմաները կլինեն նոր գլխավոր քարտուղարի ընտրությունը և Ուկրաինայի նախագահ Պյոտր Պորոշենկոյի ելույթը:

Գլխավոր քարտուղարը Խորհրդի բարձրագույն պաշտոնատար անձն է, որն այն ներկայացնում է միջազգային ասպարեզում: Նա որոշում է Եվրախորհրդի քաղաքականությունը և վերահսկում է նրա քարտուղարության աշխատանքը:

Գլխավոր քարտուղարը նաև հետևում է պետությունների կողմից Մարդու իրավունքների եվրոպական կոնվենցիայի գծով իրենց պայմանագրային պարտավորությունների կատարմանը: Նա իրավունք ունի մասնակից պետություններից պարզաբանումներ պահանջել, թե նրանք ինչպես են կատարում Կոնվենցիայի դրույթները: Իրենց հերթին մասնակից պետությունները պարտավոր են համապատասխան տեղեկատվություն տրամադրել:

Եվրախորհրդի գլխավոր քարտուղարի պաշտոնին հավակնում է երկու թեկնածու` ներկայիս գլխավոր քարտուղար Տուրբյոռն Յագլանդը և ԵԽԽՎ-ի՝ ՅՈՒԿՕՍ-ի գործով նախկին զեկուցող, Գերմանիայի արդարադատության նախկին նախարար Սաբինա Լոյտհոյզեր-նարենբերգերը: Յագլանդն իր աշխատանքում վերջին ժամանակներս հատուկ ուշադրություն էր դարձնում Խորհրդի բարեփոխմանը, Եվրամիություն-Եվրախորհուրդ հարաբերությունների բարելավմանը և «Եվրոպան քաղաքացիների համար» հայեցակարգի առաջշարժմանը: Լոյտհոյզեր-Շնարենբերգերը իր գործունեության մեջ հիմնական շեշտը դնում է մարդու իրավունքների հարգման, օրենքի գերակայության և ժողովրդավարության վրա:

Գլխավոր քարտուղարն ընտրվում է հինգ տարի ժամկետով: Եթե թեկնածուն ընտրությունների առաջին փուլում չի հավաքում ձայների ավելի քան 50 տոկոսը, կազմակերպվում է երկրորդ փուլ: Այդ փուլի հաղթող է դառնում այն թեկնածուն, որը հավաքում է ձայների պարզ մեծամասնությունը:

ԵԽԽՎ-ի նոր գլխավոր քարտուղարի ընտրությունների առաջին փուլը տեղի կունենա հունիսի 24-ին:

Նստաշրջանի նախօրեին հայտնի է դարձել, որ եվրախորհրդարանականների առջև պլանավորում է ելույթ ունենալ Ուկրաինայի նախագահ Պյոտր Պորոշենկոն:

Վեհաժողովի աշխատակազմի ներկայացուցիչը ՌԻԱ Նովոստիին հայտնել է, որ «սկզբում Ուկրաինայի նախագահը վեհաժողովում ելույթ կունենա կարճ հաղորդմամբ, իսկ այնուհետև կպատասխանի խորհրդարանականների հարցերին»:

Ինչպես սպասվում է, Ուկրաինայի նախագահի ելույթը տեղի կունենա հունիսի 26-ին: Պորոշենկոյի ելույթից բացի, նստաշրջանի շրջանակներում կներկայացվեն Ուկրաինայի վաղաժամկետ նախագահական ընտրությունների դիտարկման արդյունքները, ընտրություններ, որոնք հանրապետությունում անցկացվել են մայիսի 25-ին:

ԵԽԽՎ-ում քննարկվելիք այլ հարցերի թվում են ԶԼՄ-ներում բռնությունների հիմնախնդիրը, Եվրախորհրդի Զարգացման բանկի գործունեությունը, Արևմտյան Սահարայի հակամարտությունը, խորհրդարանականները կքննարկեն նաև «Եվրոպական ժողովրդավարության կատարելագործման մասին. ֆեդերալ Եվրոպայի տանող ճանապահի խոչընդոտները» զեկույցը: Նախարարների կոմիտեի անունից հաղորդմամբ հանդես կգա դրա նախագահ, Ադրբեջանի արտաքին գործերի նախարար Էլմար Մամեդյարովը: