Պորոշենկոն Մերկելին և Բայդենին գանգատվել է, որ Ուկրաինայի արևելքում խախտվում է հրադադարը

Ուկրաինայի նախագահ Պյոտր Պորոշենկոն հեռախոսազրույց է ունեցել Գերմանիայի կանցլեր Անգելա Մերկելի հետ: Այդ մասին հաղորդել է «Ուկրինֆորմը»՝ հղում անելով պետության ղեկավարի մամուլի ծառայությանը:

«Ուկրաինայի արևելքում հակամարտությունը կարգավորելու համար Անգելա Մերկելի և աշխարհի մյուս ղեկավարների անձնական մասնակցությունն ու օգնությունը խիստ կարևոր է»,- հայտարարել է Պորոշենկոն:

Ուկրաինայի նախագահը ԳՖՀ-ի կանցլերին տեղեկացրել է, որ վերջին մեկ օրվա ընթացքում Դոնեցկի և Լուգանսկի մարզերում զինյալների կողմից հրադադարը խախտվել է ավելի քան քսան անգամ:

Իր հերթին Մերկելը հավաստել է աջակցությունը Պորոշենկոյի խաղաղ ծրագրին և պատրաստակամություն է հայտնել առավելագույնս նպաստել բոլոր շահագրգիռ կողմերի երկխոսությանը:

Ինչպես հունիսի 23-ին հաղորդել է Սպիտակ տունը, Պորոշենկոն ԱՄՆ-ի փոխնախագահ Ջո Բայդենի հետ հեռախոսազրույցի ընթացքում նույնպես նշել է, որ Ուկրաինայի արևելքում աշխարհազորայինները շարունակում են ռազմական գործողությունները, այդ թվում՝ հրետանու կիրառմամբ:

Պորոշենկոն նշել է, որ աշխարհազորայինները «հրադադարի հայտարարումից հետո շարունակել են գրոհել ուկրաինական ուժերի վրա, այդ թվում` հրետանու կիրառմամբ»:

Իր կողմից Բայդենը աջակցություն է հայտնել Պորոշենկոյի խաղաղ ծրագրին և խոստացել է աշխատել G7-ի գծով գործընկերների հետ, որպեսզի նոր տնտեսական պատժամիջոցներ պատրաստվեն Ռուսաստանի դեմ:

Մինչ այդ «Ռոսիյսկայա գազետա» թերթը հրապարակել է Ուկրաինայի արևելքի իրադրության խաղաղ կարգավորման վերաբերյալ Պորոշենկոյի ծրագրի մանրամասները: Այն ներառում է 14 կետ, որոնց թվում են բանակցությունների բոլոր մասնակիցների համար անվտանգության երաշխիքները, քրեական պատասխանատվությունից այն անձանց ազատումը, ովքեր վայր են դրել զենքը և չեն կատարել ծանր հանցագործություններ, պատանդների ազատումը, ռուս-ուկրաինական պետական սահմանում 10-կիլոմետրանոց բուֆերային գոտու ստեղծումը, անօրինական զինված կազմավորումների դուրսբերումը, ռուս և ուկրաինացի վարձկանների դուրս գալու համար երաշխավորված միջանցքի ստեղծումը, զինաթափումը, Լուգանսկի և Դոնեցկի մարզերում բռնազավթված վարչական շենքերի ազատումը, իշխանության տեղական մարմինների գործունեության վերսկսումը, Դոնեցկի և Լուգանսկի մարզերում կենտրոնական հեռուստառադիոհաղորդումների վերսկսումը, իշխանության ապակենտրոնացումը գործադիր կոմիտեների ընտրման ճանապարհով, ռուսաց լեզվի պաշտպանությունը, վաղաժամկետ տեղական և խորհրդարանական ընտրությունների կազմակերպումը, տարածաշրջանում աշխատատեղերի ստեղծման ծրագիրը:

Հունիսի 20-ին Պորոշենկոն հրաման է տվել մեկ շաբաթով հրադադար հաստատելու մասին, մինչդեռ ինքնահռչակ Դոնեցկի Ժողովրդական Հանրապետության ղեկավարությունը հայտարարել է, որ չի ընդունում զինադադարը: Համապատասխան հայտարարությունը, որը ստորագրել է ԴԺՀ-ի աշխարհազորի հրամանատար Իգոր Ստրելկովը, հունիսի 22-ին Ֆեյսբուքի իր էջում զետեղել է Դոնբասի «ժողովրդական նահանգապետ» Պավել Գուբարևը: Դրանում նշվում է, որ ուկրաինացի զինվորականների կողմից միակողմանի կարգով հայտարարված հրադադարը համաձայնեցված չի եղել աշխարհազորայինների հետ: