Ավելի քան 20 մարդ է վիրավորվել Կոսովոյի հյուսիսում տեղի ունեցած անկարգությունների ընթացքում

Քսանմեկ մարդ է վիրավորվել Կոսովոյի հյուսիսի Կոսովսկա Միտրովիցա քաղաքում հունիսի 22-ին տեղի ունեցած անկարգությունների ընթացքում, որոնցից 13-ը կարգի պահապաններ են և երկուսը՝ լրագրող:

Անկարգությունները հրահրել են կոսովցի ալբանները, որոնք հանդես են եկել սերբերի կողմից Կոսովսկա Միտրովիցայում Իբար գետի վրա գտնվող կենտրոնական կամրջի փակման դեմ: Այդ գետը քաղաքը բաժանում է ալբանական և սերբական մասերի, իսկ երկու կողմերը միացնող կամրջի մերձակա շրջաններն ավելի վաղ բազմիցս դարձել են ազգամիջյան լարվածության վայրեր:

Մի քանի օր առաջ սերբերը կամրջի իրենց կողմից վերացրել են 2011 թվականից ի վեր այդտեղ գտնվող բարիկադը, իսկ դրա փոխարեն մի քանի շարքերով տեղադրել են զանգվածեղ չաներ` բույսերով` դա անվանելով «Խաղաղության զբոսայգի» և կրկին լիովին փակելով երթևեկելի մասը:

Դա հարուցել է տեղացի ալբանների բողոքները, որոնցից շուրջ հազարը հավաքվել են կամրջի մոտ` քաղաքի երկու մասերը միավորելու պահանջով և փորձել են կտրել-անցնել անվտանգության ջոկատաշղթան: Դրա հետևանքով ոստիկանությունն ստիպված է եղել խուլիգաններին ցրելու համար կիրառել արցունքաբեր գազ և աղմկահան նռնակներ: Բողոքի պատճառով ձերբակալվել է հինգ մարդ, հրկիզվել է չորս ավտոմոբիլ, որոնք պատկանում էին Կոսովոյի ոստիկանությանը, Եվրամիության և ՄԱԿ-ի ներկայացուցչություններին: Առաջիկա օրերին տեղացի և միջազգային իրավապահները կուժեղացնեն կամրջի վերահսկողությունը, հաղորդել է ՌԻԱ Նովոստին: