Գերմանացի գիտնականը 150 տարով կսառեցնի իրեն

Գերմանացի 75-ամյա գիտնական Կլաուս Սամեսը իրեն կենթարկի այսպես կոչված կրիկոնսերվացման գործընթացի, որի ընթացքում օրգանիզմը սառեցնում են հետագայում դրա կենսաբանական գործառույթների վերականգնման նպատակով: Ինչպես հունիսի 23-ին հաղորդել է գերմանական Bild թերթը, պրոֆեսորն արդեն պայմանագիր է ստորագրել Միացյալ Նահանգների «Կրիոնիկայի ինստիտուտ» (Cryonic Institute) ոչ առևտրային կազմակերպության հետ, որի պահեստարաններում նրա մարմինը կպահվի այնքան ժամանակ, քանի դեռ մարդկությունը չի սովորի վերակենդանացնել «սառեցված» բջիջները:

Ենթադրվում է, որ Սամեսի մարմինը կսառեցվի մինչև մինուս 196 աստիճան: Այն բանից հետո, երբ իրավաբանորեն կգրանցվի ուղեղի մահը, նրան կտեղավորեն սառցակտորներով արկղի մեջ, և կսկսեն պատրաստել ԱՄՆ տեղափոխմանը: Այնուհետև պրոֆեսորին կտանեն Քլինթոն Թաունշիփ քաղաք (Միչիգանի նահանգ), որտեղ գտնվում է «Կրիոնիկայի ինստիտուտի» կենտրոնակայանը: Այնտեղ նրա երակներից պոմպով կհանեն արյունը, այն կփոխարինեն հատուկ ֆիզլուծույթով, որը հեղուկ ազոտով խցում կպնդանա հետագա սառեցման ժամանակ:

Կրիոնիկայի հիմնադիր է համարվում ամերիկացի գիտնական Ռոբերտ Էթինգերը: 1962 թվականին նա հռչակվեց՝ հրապարակելով «Անմահության հեռանկարները» (The Prospect Of Immortality) վերնագրով աշխատությունը: Այս գիրքն նկատելի ազդեցություն է գործել գիտական աշխարհի վրա, ինչի արդյունքում աշխարհում սկսել են կազմավորվել նրա գաղափարների պաշտպանության առաջին շարժումները:

Այժմ գոյություն ունեն սոսկ երեք կրիոնային ֆիրմաներ, որոնք ունեն սեփական պահեստարաններ և այս բնագավառում առաջարկում են ամբողջական ծառայություններ: Երկուսը գտնվում են ԱՄՆ-ում, ևս մեկը՝ Ռուսաստանում: Ըստ 2013 թվականի տվյալների՝ իրեն սառեցրել է շուրջ 250 մարդ, հաղորդել է ԻՏԱՌ-ՏԱՍՍ-ը: