Վրաստանը ՆԱՏՕ-ին անդամակցելու շանսեր չունի. Բուրջանաձե

Վրաստանը Հյուսիսատլանտյան դաշինքին միանալու շանսեր չունի, քանի դեռ նրա տարածքում են գտնվում ռուսական զորքերը: Այդ մասին Թբիլիսիում կայացած ճեպազրույցի ընթացքում հայտարարել է Վրաստանի խորհրդարանի նախկին խոսնակ, «Միավորված ընդիմություն» կոալիցիայի առաջնորդ Նինո Բուրջանաձեն:

«Վրաստանը ՆԱՏՕ-ին միանալու շանսեր չունի, քանի դեռ Վրաստանի տարածքում տեղակայված են ռուսական ռազմակայաններ: Չպետք է խաբել ժողովրդին»,- ասել է նա:

Բուրջանաձեի խոսքով՝ նրանք, ովքեր ասում են, թե Վրաստանն այսօր-վաղը պետք է դառնա դաշինքի անդամ, «գործնականում հաստատում են այն, որ Վրաստանը պետք է ՆԱՏՕ մտնի առանց Աբխազիայի և Ցխինվալի տարածաշրջանի»:

«Եթե հարկ լինի ընտրություն կատարել ՆԱՏՕ-ին անդամակցելու և Աբխազիայի ու Ցխինվալի տարածաշրջանի միջև, ես՝ որպես Վրաստանի քաղաքացի և որպես քաղաքական գործիչ, ընտրում եմ իմ հայրենիքի միասնությունը: Ես ընտրում եմ Աբխազիան և Ցխինվալի տարածաշրջանը: Դա իմ ամենագլխավոր գերակայությունն է»,- ասել է Բուրջանաձեն:

Մայիսի սկզբին ՆԱՏՕ-ի գլխավոր քարտուղար Անդերս Ֆոգ Ռասմուսենը հայտարարել է, որ ՆԱՏՕ-ն դեռևս չի լուծել սեպտեմբերին կայանալիք գագաթնաժողովում Վրաստանին՝ դաշինքին անդամակցելու գործողությունների ծրագիր տրամադրելու հարցը, հաղորդել է «Նովոստի Գրուզիան»: