Դաշնության խորհուրդը հավանություն է տվել Հայաստանին գազի, նավթի և ալմաստների անմաքս մատակարարման համաձայնագրին

ՌԴ-ի Դաշնության խորհուրդը հունիսի 25-ին կայացած նիստում վավերացրել է Հայաստանի հետ միջկառավարական համաձայնագիրը, որը վերաբերում է համագործակցությանը բնական գազի, նավթամթերքների և չմշակված ալմաստների մատակարարումների ոլորտում, տեղեկացնում է ՌԻԱ Նովոստին:

Համաձայնագիրն ստորագրվել է 2013 թվականի դեկտեմբերին Երևանում և նախատեսում է այդ ապրանքների անմաքս մատակարարումների կազմակերպում մինչև Եվրասիական ինտեգրացիոն տարածքին Հայաստանի անդամակցությունը:

Ռուսական կողմն, ըստ համաձայնագրի, արտահանական մաքսատուրքեր չի գանձում ներքին սպառման ծավալներով նավթամթերքներից և բնական գազից, ծավալներ, որոնք հաստատվել են ինդիկատիվ հաշվեկշիռների կազմում, ինչպես նաև Հայաստանին մատակարարվող ալմաստներից:

Արգելվում է նաև երրորդ երկրներ այն ապրանքների վերաարտահանումը, որոնք անմաքս Հայաստանին են մատակարարվում ՌԴ-ից:

Ըստ համաձայնագրի՝ կողմերի իրավասու մարմինները համաձայնեցնում են հաջորդ օրացուցային տարվա համար Հայաստանում նավթամթերքների և բնական գազի ներքին սպառման ծավալներն ու անվանացուցակը: ՌԴ-ի ալմաստ արդյունահանող ձեռնարկությունների կողմից Հայաստանի երեսակող ձեռնարկություններին չմշակված բնական ալմաստների մատակարարումների կարգն ու ծավալները սահմանելու համար ՌԴ-ի և Հայաստանի տնտեսավարող սուբյեկտների միջև կնքվում են պայմանագրեր: