Օլանդը և Մերկելը Պուտինի հետ քննարկել են Ուկրաինայի իրադրությունը

Ֆրանսիայի նախագահ Ֆրանսուա Օլանդը և Գերմանիայի կանցլեր Անգել Մերկելը հուլիսի 3-ին Ռուսաստանի նախագահ Վլադիմիր Պուտինի հետ հերթական հեռախոսազրույցն են անցկացրել Ուկրաինայի իրադրության շուրջ: Այդ մասին ասված է Ելիսեյան պալատի հաղորդագրության մեջ:

«Հանրապետության նախագահ Ֆրանսուա Օլանդը և ԳՖՀ-ի կանցլեր Անգելա Մերկելը այսօր առավոտյան միասին ՌԴ նախագահ Վլադիմիր Պուտինի հետ հեռախոսազրույց են անցկացրել Ուկրաինայի իրադրության շուրջ: Նրանք ընդգծել են այն համաձայնության իրագործման կարևորությունը, որը երեկ Բեռլինում Ֆրանսիայի, Գերմանիայի, Ուկրաինայի և Ռուսաստանի արտաքին գործերի նախարարների միջև կնքվել է երկկողմ հրադադարի հասնելու համար»,-ասված է հաղորդագրության մեջ:

Հուլիսի 2-ին Ռուսաստանի, Ֆրանսիայի, Գերմանիայի և Ուկրաինայի ԱԳ նախարարները երկժամյա բանակցություններ են վարել Բեռլինում. դրանց հիմնական արդյունքը դարձել է համատեղ հռչակագրի մշակումը, որում կողմերը հավաստել են Ուկրաինայում խաղաղության հասնելու պարտավորությունը: Հռչակագիրը նպատակամղված է Ուկրաինայում կայուն հրադադարի հասնելուն: Դրա համար գլխավոր մեխանիզմ պետք է դառնա շփման խմբի աշխատանքը, որը պետք է վերսկսվի հուլիսի 5-ից ոչ ուշ:

Ֆրանսիայի և Գերմանիայի ղեկավարները կոչ են արել Մոսկվային՝ օժանդակել շփման խմբի հանդիպման կազմակերպմանը, որի ընթացքում պետք է որոշվեն զինդադարի պայմանները: Ֆրանսիայի նախագահի վարչակազմի հաղորդագրության համաձայն՝ հեռախոսազրույցի ընթացքում նաև խնդրանք է հայտնվել ՌԴ-ին՝ «որպես միջնորդ հանդես գալու» աշխարհազորայինների հետ հանդիպումներում և նրանց դրդել նստելու բանակցությունների սեղանի շուրջ և համաձայնության հասնելու Ուկրաինայի իշխանությունների հետ:

Ֆրանսիայի նախագահը և Գերմանիայի կանցլերը, բացի այդ, պաշտպանել են ռուս-ուկրաինական սահմանի նկատմամբ հսկողություն սահմանելու վերաբերյալ նախօրյակին Բեռլինում ընդունված դրույթները, հաղորդել է ՌԻԱ Նովոստին: