Հերթական ոչ մարտական զոհն է գրանցվել Ադրբեջանի ԶՈւ-ում

Ադրբեջանի զինված ուժերում գրանցվել է հերթական զինծառայողի ոչ մարտական պայմաններում մահը: Ինչպես հաղորդում է 1news.az լրատվական կայքը, միջադեպը տեղի է ունեցել Ադրբեջանի պետական սահմանային ծառայության Զաքաթալայի շրջանում տեղակայված զորամասում:

Ադրբեջանի պետական սահմանային ծառայության մամուլի ծառայությունը հայտնել է, որ 19-ամյա զինվոր Շամսադին Նարիման օղլու Իսքանդերովը խախտել է էլեկտրականության հետ վարվելու անվտանգության կանոնները, ինչի արդյունքում կարճ միացում է տեղի ունեցել, և նա էլեկտարական հարված է ստացել: Ադրբեջանցի զինվորը տեղում մահացել է:

Նշվում է, որ Շ.Իսքանդերովը զինծառայության էր կանչվել այս տարվա հունվարին, Ադրբեջանի Գուբայի շրջանի Ալիբեյգըշլաք գյուղից:

Սա ադրբեջանական բանակում վերջին երեք օրերին ադրբեջանցի զինծառայողի ոչ մարտական պայմաններում մահվան երկրորդ դեպքն է: Հունիսի 30-ին Ադրբեջանի ՊՆ զորամասերից մեկում վիճաբանության ժամանակ զինվոր Յաշար Ահադզադեն երկաթե իրով հարվածել էր իր ծառահակից Իլքին Մուստաֆաևին, ով տեղում մահացել էր:

Ադրբեջանի պաշտպանության նախարարության մամուլի ծառայությունը հաստատել է ադրբեջանական բանակի զինվոր Էլսևեր Հասան օղլու Մամեդովի` երեկ գիշեր ադրբեջանա-ղարաբաղյան հակամարտ զորքերի շփման գոտում վիրավորվելու փաստը:

Ադրբեջանական ԶԼՄ-ների համաձայն` 2014 թվականի սկզբից մինչ այժմ ադրբեջանական բանակում կորուստը կազմել է 48 զինծառայող, որոնցից 38-ը զոհվել է ոչ մարտական պայմաններում, 85 զինծառայող էլ վիրավորվել կամ տարբեր աստիճանի վնասվածքներ է ստացել: