Իրանին և «վեցյակին» դեռևս չի հաջողվել փոխզիջում գտնել մի շարք հարցերի շուրջ

Իրանի և միջազգային միջնորդների «վեցյակի» ներկայացուցիչներին Վիեննայի բանակցություններում առայժմ չի հաջողվում դիրքորոշումները համաձայնեցնել մի ամբողջ շարք հարցերի շուրջ, որոնք վերաբերում են իրանական միջուկային ծրագրին: Այդ մասին, ինչպես տեղեկացնում է «Արմենպրես»-ը, հուլիսի 7-ին հաղորդել է Associated Press գործակալությունը՝ վկայակոչելով դիվանագիտական աղբյուրներ: Նրանց տվյալներով՝ վերջնական համաձայնության տեքստի նախագծում դեռևս բացակայում են մի շարք կարևոր դրույթներ: Գործակալության զրուցակիցները նշել են, որ բանակցություններում գլխավոր խնդիրը մնում է Իրանում ուրանի հարստացման հարցը: Իր կողմից իրանական ԻՌՆԱ գործակալությունը հաղորդում է, որ հուլիսի 7-ին Ավստրիայի մայրաքաղաքում բանակցություններ տեղի կունենան Իրանի արտաքին գործերի նախարար Ջավադ Զարիֆի և եվրոպական դիվանագիտության ղեկավար Քեթրին Էշթոնի միջև: Ենթադրվում է, որ նրանք կքննարկեն իրանական միջուկային միջուկային ծրագրի վերաբերյալ համապարփակ համաձայնագրի պատրաստման ընթացքը: Հուլիսի 2-ին Վիեննայում մեկնարկել է միջազգային միջնորդների «վեցյակի» (Ռուսաստան, ԱՄՆ, Գերմանիա, Չինաստան, Մեծ Բրիտանիա, Ֆրանսիա) և Թեհրանի բանակցությունների հերթական լիաֆորմատ փուլը: Իրանի պատվիրակությունը գլխավորում է հանրապետության արտաքին գործերի նախարար Մոհամադ Ջավադ Զարիֆը: Բանակցությունների նպատակը իրանական միջուկային ծրագրի շուրջ ստեղծված իրադրության կարգավորման վերաբերյալ համապարփակ համաձայնագրի մշակումն է:

Պլանավորվում է, որ Թեհրանի միջուկային ծրագրի շուրջ բանակցությունների եզրափակիչ փուլը կտևի մինչև հուլիսի 20-ը՝ ժամկետ, որի ընթացքում կողմերը ձգտում են համաձայնություն կնքել Իրանի միջուկային ծրագրի խաղաղ բնույթի երաշխիքների մասին՝ երկրի նկատմամբ սահմանված միջազգային պատժամիջոցները չեղարկելու դիմաց: Ավելի վաղ Իրանի խորհրդարանի խոսնակ Ալի Լարիջանին ազգային անվտանգության և արտաքին քաղաքականության խորհրդարանական հանձնաժողովի անդամների առջև ունեցած իր ելույթում հայտարարել է, որ Թեհրանը կշարունակի պաշտպանել իր իրավունքը միջուկային տեխնոլոգիաների ստեղծման բնագավառում: «Մենք ամուր ենք կանգնած մեր օրինական իրավունքների պաշտպանության դիրքերում: Արտաքին ճնշումն ու սպառնալիքները միայն էլ ավելի ուժեղացրին իրանական ազգին»,- ասել է Լարիջանին: Քաղաքական գործիչը նաև հայտարարել է, որ Իսլամական Հանրապետությունն այսուհետև էլ չի հրաժարվի միջուկային տեխնոլոգիաների մշակման իր իրավունքից, հաղորդել է «Ինտերֆաքս»-ը: