Թուրքիան սահմանափակում է ոչ սունիների կրոնական ազատությունները. ամերիկյան զեկույց

ԱՄՆ-ի պետքարտուղարության միջազգային կրոնական ազատությունների զեկույցը քննադատել է Թուրքիայում իշխանությունների կողմից ոչ սունիների կրոնական ազատությունների սահմանափակումները: Զեկույցում նշվում է, որ չնայած Թուրքիայի սահմանադրությամբ պաշտպանության տակ են առնված կրոնական փոքրամասնությունների ազատություններն ու իրավունքները, սակայն, այդ երկրում տարվող իրական քաղաքականությունները սահմանափակում են նրանց իրավունքները: Ինչպես հաղորդում է «Արմենպրես»-ը՝ վկայակոչելով թուրքական «Հուրիեթ» թերթը, զեկույցում ընդգծվում է, որ Թուրքիայում վերջին տարիներին հակահրեական դրսևորումների մեծ աճ է նկատվում:

«Օսմանյան կայսրության շրջանում պետության կողմից ճանաչվել են հայերի, հույների, ասորիների, հրեաների, այլ կրոնական և ազգային փոքրամասնությունների ազատություններն ու իրավունքները և պաշտպանվել: Չնայած Թուրքիայի Հանրապետության շրջանում կառավարությունը սկսել է վերադարձնել փոքրամասնություններից խլած կրոնական հիմնադրամները, սակայն, Հեյբելի կղզում արդեն 40 տարի փակ հունական վանական համալիրը և ասորական Սուրբ Գաբրիել վանքը մինչ այժմ վերադարձված չեն իրական տերերին: Կառավարությունը շարունակում է պաշտոնապես չճանաչել ալևիների աղո թատեղիները: Թուրքիայում սահմանափակվում են ոչ սունիների՝ ալևիների, շիաների, քրիստոնյաների, հրեաների և բահաիների (բաբիզմի ճյուղերից) կրոնական իրավունքները և ճնշումների ենթարկվում», -ասվում է զեկույցում:

Զեկույցը Թուրքիայի կառավարության ուշադրությանն է ներկայացրել այն, որ ԱՄՆ-ի փոխնախագահ Ջո Բայդենը և պետքարտուղար Ջոն Քերին ու այլ բարձրաստիճան պաշտոնյաներ բազմիցս կոչ են արել վերաբացել Հեբելիի հունական վանական համալիրը, որտեղ Կոնստանդնուպոլսի հունական պատրիարքարանը դարեր շարունակ աստվածաբաններ է պատրաստել: