Վարչապետ Յացենյուկը Գերագույն ռադայի պատգամավորներից պահանջել է ներկայանալ խորհրդարան

Կարգադրություն է ստորագրվել հուլիսի 31-ին Ուկրաինայի Գերագույն ռադայի արտահերթ նստաշրջան գումարելու մասին, որտեղ պետք է ընդունվեն երկրի համար անհրաժեշտ օրինագծեր: Այդ մասին, ինչպես տեղեկացնում է «Արմենպրես»-ը՝ հղում անելով «Ուկրինֆորմ»-ին, Ուկրաինայի վարչապետ Արսենի Յացենյուկը հայտնել է ICTV ալիքի «Խոսքի ազատությունը» ծրագրով:

Ինչպես ճշտում է Ուկրաինայի նախարարների կաբինետի տեղեկատվության և հասարակայնության հետ կապերի դեպարտամենտը, խոսքն Ուկրաինայի պետական բյուջեում փոփոխությունների նախագծի մասին է, որը, մասնավորապես, նախատեսում է 9,1 մլրդ գրիվնա տրամադրել երկրի զինված ուժերի և Ազգային գվարդիայի կարիքների, 3 մլրդ գրիվնա՝ ապստամբների գործողություններից տուժած տարածաշրջանների վերականգնման, 1 մլրդ գրիվնա՝ մյուս մարզերի սոցիալ-տնտեսական զարգացման համար:

Կառավարության ղեկավարը նշել է, որ հուլիսի 24-ին խորհրդարանում այդ օրինագծերի ձախողումից հետո «1,5 մլրդ դոլար է առկախվել, որն արդեն Ուկրաինային հատկացվելու ճանապարհին էր»: 500 մլն դոլարը Համաշխարհային բանկից էր և 1 մլրդ դոլարը՝ Արժույթի միջազգային հիմնադրամից. «Այդ օրինագծերի օգտին քվարկության բացակայություն, և հաջորդ քայլը երկրի դեֆոլտն է»:

«Ուկրաինայի Գերագույն ռադայի պատգամավորներից պահանջում եմ՝ հուլիսի 31-ին ժամանել խորհրդարան, քվեարկել օրենքների օգտին և նախագահի ու կառավարության հետ համատեղ պատասխանատվություն կրել ուկրաինական ժողովրդի առջև: Դա նրանց սրբազան պարտքն է, և այն պետք է կատարել: Դրա համար էլ նրանց ընտրել են»,-ընդգծել է Յացենյուկը: