«Ռուսաստանը վերստին հանդես է գալիս Ուկրաինային շուրջ բանակցություններ սկսելու օգտին». Լավրով

Անհրաժեշտ է Ուկրաինայի հակամարտության խաղաղ լուծում գտնել, որը կապահովեր երկրի բոլոր քաղաքացիների և տարածաշրջանների իրավունքը: Այդ մասին, ինչպես տեղեկացնում է «Արմենպրես»-ը, ՌԴ-ի ԱԳ նախարար Սերգեյ Լավրովը հայտարարել է Տաջիկստանի արտաքին գործերի նախարար Սիրոջիդդին Ասլովի հետ բանակցություններից հետո կայացած մամուլի ասուլիսում:

«Անշուշտ, մենք խոսել ենք Ուկրաինայի արևելքում շարունակվող զինված հակամարտության մասին: Մենք միասնական ենք արյունահեղության դադարեցման և անհապաղ բանակցություններ սկսելու անհրաժեշտության հարցում այն առումով, որ Ուկրաինայի բոլոր տարածաշրջանների համար ընդունելի լուծումներ մշակենք»,-ասել է Լավրովը:

Իր հերթին, Ուկրաինայի արտաքին գործերի նախարար Պավել Կլիմկինը Reuters գործակալությանը տված հարցազրույցում հայտարարել է, որ հանրապետության իշխանությունները մտադիր են աշխարհազորայինների կողմից վերահսկվող քաղաքների նկատմամբ հսկողությունը վերադարձնել «քաղաքական գործընթացների միջոցով» և պատրաստ են տարածաշրջաններին տրամադրել «շատ ավելի մեծ ազատություն»:

«Մենք հարվածներ չենք հասցնելու այդ քաղաքներին»,-հայտարարել է Կլիմկինը, խոսելով Դոնեցկի ու Լուգանսկի մասին, որոնք այժմ գտնվում են աշխարհազորայիների վերահսկողության ներքո: Նա նշել է, որ, վերջին հաշվով, միայն քաղաքական որոշումը կնպաստի հակամարտության կարգավորմանը երկրի արևելքում: ԱԳ նախարարի խոսքով՝ Կիևի իշխանությունները քաղաքների նկատմամբ հսկողություն կհաստատեն «ոչ թե քաղաքները գնդակոծելու, այլ քաղաքական գործընթացների միջոցով»:

Նա նաև պաշտպանել է երկրի արևելքում հակամարտության կարգավորման հարցերին նվիրված նոր միջազգային խորհրդաժողով անցկացնելը և հայտարարել, որ Կիևը պատրաստ է տարածաշրջաններին տրամադրել «շատ ավելի մեծ ազատություն»: Կլիմկինն ասել է, որ խորհրդաժողովի անցկացման հարցն ինքը նախօրյակին քննարկել է ԱՄՆ-ի պետքարտուղար Ջոն Քերիի հետ իր հանդիպման ընթացքում, հաղորդել է ՌԻԱ Նովոստին: