Հայ դատի ԱՄՆ հանձնախումբը պահանջում է վերջ տալ ալիևյան հարձակումներին

Հայ դատի ԱՄՆ հանձնախմբի գործադիր տնօրեն Արամ Համփարյանը հայտարարություն է արել Ադրբեջանի կողմից Հայաստանի և Լեռնային Ղարաբաղի ուղղությամբ կատարված վերջին հարձակումների վերաբերյալ: «Հուլիսի 31-ին և օգոստոսի 1-ին Հայաստանի և Լեռնային Ղարաբաղի սահմաններին Ադրբեջանի հարձակումները այդ երկրի անշրջահայաց ռազմական ագրեսիայի ամենաթարմ վկայություններն են` հակառակ տարածաշրջանի կայունացման և արդարացի ու տևական խաղաղության հաստատման միջազգային հանրության ջանքերին»,- «Արմենպրես»-ի հաղորդմամբ, նշել է Համփարյանը:

Նա նաև ընդգծել է, որ ԵԱՀԿ Մինսկի խմբի կողմից Ադրբեջանի ռազմական գորոծողություններին պատշաճ արձագանքի բացակայությունը նպաստում է անպատժելիության վտանգավոր մթնոլորտի ստեղծմանը, ինչն էլ հանգեցրել է վերջերս սաստկացած բռնություններին:

«Ժամանակն է վերջ տալ ալիևյան հարձակումներին արհեստական անկողմնակալությամբ և դիվանագիտական երկիմաստ զրույցներով պատասխանելու վատ սովորությանը: Միայն միանշանակ դատապարտումը կարող է կանխել Ալիևի` կովկասյան նոր պատերազմ հրահրելու մարտավարությանը»,- ընդգծում է Համփարյանը:

Առաջին կարևոր քայլը, ըստ նրա, կլինի ԵԱՀԿ-ի գլխավորած միջազգային քարոզարշավի մեկնարկը, որը Բաքվից կպահանջի սահմանից հեռացնել դիպուկահարներին, ինչն արդեն երեք տարի առաջարկում են Հայաստանն ու Լեռնային Ղարաբաղը:

ԱՄՆ պետքարտուղարության խոսնակի տեղակալ Մարի Հարֆն օգոստոսի 1-ին Միացյալ Նահանգների մտահոգություններն է փոխանցել «բռնությունների սրացման» վերաբերյալ: Սակայն հստակ դատապարտում հրադադարը խախտող կողմի` Ադրբեջանի հասցեին այդպես էլ չի հնչել: ԱՄՆ-ը ՀՀ և Ադրբեջանի նախագահներին նաև կոչ է արել ամենաառաջին իսկ հնարավորության դեպքում հանդիպել` առանցքային հարցերի շուրջ երկխոսություն վերսկսելու համար: