Քեմերոնը ՆԱՏՕ-ին կոչ է արել վերանայելու Ռուսաստանի հետ հարաբերությունները

ՆԱՏՕ-ն պետք է վերանայի Ռուսաստանի հետ հարաբերություններն ի պատասխան Ուկրաինայում նրա գործողությունների, կարծում է Մեծ Բրիտանիայի վարչապետ Դևիդ Քեմերոնը, հաղորդել է BBC News-ը:

ՆԱՏՕ-ի երկրների ղեկավարներին հղած նամակում Քեմերոնն ասում է, որ Ռուսասանը խախտել է բոլոր կանոնները՝ իրեն միացնելով Ղրիմը: Քեմերոնը կրկնել է նաև Մոսկվայի հասցեին բոլոր մեղադրանքներն Ուկրաինայի հարավ - արևելքում աշխարհազորայիններին զենք հանձնելու մասին, տեղեկացնում է «Արմենպրես»-ը:

Վարչապետը, դիմելով Հյուսիսատլանտյան դաշինքի երկրների ղեկավարներին ՆԱՏՕ-ի գագաթնաժողովի նախաշեմին, որը տեղի կունենա հաջորդ ամսին Ուելսում, նաև քննադատության է ենթարկել և այն, թե ինչպես են իրենց պահում Ռուսաստանի իշխանությունները մալայզիական հանրանավի աղետից հետո, որը գրեթե 300 մարդու կյանք խլեց:

Մոսկվան ժխտում է աշխարհազորին զինելու փաստը և ավելի վաղ մերժել է բոլոր բողոքները մարդատար հանրանավի անկման պատճառների հետաքննության առիթով:

Քեմերոնի խոսքով՝ ՆԱՏՕ-ն պետք է համաձայնության գա «ռուսական ագրեսիայի» դեմ նոր միջոցների շուրջը, որոնք կհանգստացնեն իրենց անվտանգության համար երկյուղ կրող դաշնակիցներին, հաղորդել է «Ինտերֆաքսը»: