«Ժողովուրդ». Հովիկ Աբրահամյանի կառավարությունը չկողմնորոշված է

«Ժողովուրդ» թերթը գրում է. «ՀՀ Կառավարությունը քիչ էր մնում՝ մոռանար և Վարդավառին հաջորդող մեռելոցը աշխատանքային օր թողներ: Բանն այն է, որ Կառավարության վերջին նիստում, որը տեղի ունեցավ անցած չորեքշաբթի' հուլիսի 8-ին, մեռելոցի մասին ոչ մի խոսք չկար: Ուստի լրատվամիջոցները շաբաթօրյա իրենց թողարկումներում նշել էին, որ այս երկուշաբթի օրը կլինի վերջին տարիների առաջին մեռելոցը, որը ոչ աշխատանքային օր չի հայտարարվել: Բայց մեկ էլ հանկարծ ՀՀ Կառավարությունը շաբաթ օրը արտահերթ նիստ հրավիրեց, և մեռելոցը կրկին ոչ աշխատանքային օր հայտարարեց՝ որոշ բացառություններով:

ՀՀ դատական ակտերի հարկադիր կատարման ծառայությանը, ՀՀ կադաստրի պետական կոմիտեի ստորաբաժանումներին ու ՀՀ ոստիկանության անձնագրային և վիզաների վարչությանը հանձնարարվեց հուլիսի 13-ին պահպանել աշխատանքային ռեժիմը: Այլ կերպ ասած՝ գործադիրը չկողմնորոշվելով՝ որոշել էր մեռելոցը տեղ-տեղ աշխատանքային, տեղ-տեղ էլ ոչ աշխատանքային հայտարարել:

Ի դեպ, վարչապետ Հովիկ Աբրահամյանը նույն այդ նիստի ժամանակ ՀՀ Կառավարության աշխատակազմի ղեկավար-նախարար Դավիթ Հարությունյանին և ՀՀ արդարադատության նախարարությանը հանձնարարել է բոլոր շահագրգիռ կողմերի հետ հարցը քննարկել' միասնական մոտեցում ձևավորել: Այսինքն՝ ցանկանում են, ի վերջո, կողմնորոշվել' ոչ աշխատանքային մեռելոց, թե աշխատանքային:

Հիշեցնենք, որ ոչ աշխատանքային մեռելոցները ներդրվեցին ՀՀ նախկին վարչապետ Տիգրան Սարգսյանի կողմից:

Հ.Գ. Երեկ Իջևանում բանկերի մի մասը, օրինակ՝ «Յունիբանկի» և «Կոնվերս բանկի» տեղի մասնաճյուղերը, փակ են եղել, իսկ «ԱԿԲԱ»-ն աշխատել է: Նոյեմբերյանում «ԱԿԲԱ»-ի մասնաճյուղը սկսել է աշխատել կեսօրից հետո»:

Մանրամասները` թերթի այսօրվա համարում: