Երկնակամարում կդիտվի Մերկուրիի և Մարսի «միացումը»

Գրավիչ երկնային երևույթ կդիտվի հուլիսի 16-ին` մոլորակների միացում, երբ երկու մոլորակ դիտվում է երկնքի մի հատվածում' իրար շատ մոտ: Այս անգամ իրար մոտ կդիտվեն Մերկուրին և Մարսը։ Մերկուրիի և Մարսի միացումը (8° անկյունային հեռավորություն) դիտվելու է Երկրագնդի համարյա բոլոր կետերից: Այս մասին ԼՈՒՐԵՐ.com-ին տեղեկացրին Հայկական աստղագիտական ընկերությունից, մոլորակների միջև այդ անկյունային հեռավորությունը մոտավորապես հավասար է մարդու ճկույթի հաստությանը բազկի հեռավորության վրա: Իհարկե, իրականում Մերկուրին և Մարսը հսկայական հեռավորության վրա են միմյանցից: Պարզապես նրանք դիտվում են նույն տեսագծի ուղղությամբ: Մերկուրին Երկրից հեռու է միջինում 1.04 աստղագիտական միավոր (1 ա.մ.' Երկիր-Արեգակ հեռավորությունը, հավասար է մոտ 150 միլիոն կմ), իսկ Մարսի նվազագույն հեռավորությունը Երկրից կարող է լինել 2.4 միլիարդ կմ: Ցանկալի է միացումը դիտել բարձր վայրերից, օրինակ քաղաքում' բարձր հարկերից:

Մոլորակների միացումներ կոչվում են երկնքում երկու կամ ավելի մոլորակների իրար մոտ դիտվելը, որպես կանոն' մի քանի աստիճան անկյունային հեռավորության սահմաններում: Երկու մոլորակների միացումներ շատ հաճախ են տեղի ունենում, օրինակ 1 աստիճանի սահմաններում' որպես կանոն տարեկան 5-6 անգամ (իսկ ավելի հեռու միացումներ' շատ ավելի հաճախակի): Առավել հազվագյուտ են 3 մոլորակների միացումները (եռակի միացումներ):