Մայրաքաղաքի ծննդյան օրը լրացնելու ենք մարաշյան գույներով. Վարազդատ Մկրտչյան

«Էրեբունի-Երևան» տոնակատարությանն ընդառաջ ԼՈՒՐԵՐ.com-ը զրուցել է Երևանի պատվավոր քաղաքացի, Նորք-Մարաշ վարչական շրջանի ղեկավար Վարազդատ Մկրտչյանի հետ:

- Պարոն Մկրտչյան, ի՞նչ առանձնահատկություն ունի Նորք-Մարաշ վարչական շրջանը:

- Նորք-Մարաշը մայրաքաղաքի վարչական շրջանների շարքում առանձնանում է ոչ միայն իր աշխարհագրական դիրքով: Այստեղ բազմաբնակարաններ կարելի է ասել չկան, հիմնականում մասնավոր տնատիրություններ են, ինչով էլ, ըստ էության, բացատրվում է Երևանի այս գողտրիկ թաղամասի ինքնատիպ առօրյան:

Լինելով համեմատաբար փոքր վարչական շրջան՝ Նորք Մարաշը մայրաքաղաքի մյուս վարչական շրջաններից որոշակիորեն տարբերվում է. այստեղ գրեթե բոլորը միմյանց ճանաչում են ու հետևաբար Նորք Մարաշը կարծես մեր մեծ տան՝ Երևանի մեջ ապրող մի համերաշխ ընտանիք լինի: Երևի դա է նաև պատճառը, որ ցանկացած միջոցառման, լինի դա մեր վարչական շրջանի ավանդական միջոցառումները, ազգային ու պետական տոները, թե համաքաղաքային, Նորք Մարաշը միասնական է հանդես գալիս, ինչպես ասում են՝ ամբողջ տնով:

- Պարոն Մկրտչյան, շուտով մայրաքաղաքի ծննդյան օրն է, ինչպե՞ս են տոնին վերաբերվում Նորք-Մարաշի բնակիչները:

- Նշելու ենք 2797-ամյա մեր մայրաքաղաքին վայել ձևով, այսինքն մեծ ուրախությամբ ու բարձր տրամադրությամբ: Մեր բնակիչները, ինչպես արդեն նշեցի, կարողանում են ցանկացած միջոցառում իսկական տոնի վերածել, իսկ տոներին էլ՝ մասնակցել տոնին վայել ձևով: Մայրաքաղաքի ծննդյան օրը մեզ համար սպասված տոներից մեկն է, և հատկապես վերջին տարիներին մեր բնակիչներն առավել մեծ ակտիվությամբ են մասնակցում տոնակատարությանն ու համաքաղաքային մյուս միջոցառումներին: Պատճառը շատ պարզ է. երբեմնի ծայրամասային, շատ հարցերում ինչ-որ տեղ անտեսված թաղամասն այսօր լիարժեք ինտեգրվել է համաքաղաքային ծրագրերում, և մեր բնակիչներն էլ, բնականաբար, մայրաքաղաքի լիարժեք բնակիչ են զգում ու այդ զգացողությամբ էլ վերաբերում մեր քաղաքին ու նրա տոնին: Ամեն տարվա նման այս տարի էլ ուրախությամբ ենք նշելու մեր մայրաքաղաքի ծննդյան օրն ու տոնական միջոցառումները փորձելու ենք լրացնել մեր մարաշյան գույներով: